Бухоро вилоятида ўсмирлар ва вояга етмаганлардан ташкил топган жиноий гуруҳ қўлга олиниб, уларга нисбатан тергов ҳаракатлари олиб борилмоқда. Бу ҳақда «Дарё»га вилоят ҳокимлиги ахборот хизмати хабар берди.
Таъкидланишича, 2020 йилнинг 10 июль куни тахминан соат 00:10 да 23 ёшли Акбар (барча исмлар ўзгартирилган) жиноий шериклари 18 ёшли Мурод, вояга етмаганлар 17 ёшли Фарҳод, Ойбек, 16 ёшли Адҳам, Бобур ҳамда Марат билан бир гуруҳ бўлиб, Бухоро шаҳрида яшовчи Фарруҳ исмли фуқарога тегишли Damas русумли автомашина эшигини бузган ва автомашина салонида бўлган уяли телефон қувватлагичи, ҳамёндаги 2260 доллар ва 500 Россия рублини ўғирлаб, ҳодиса жойидан яширинган.
Бундан ташқари Акбар ва унинг шериклари ўз жиноий ҳаракатларини давом эттириб, шу куни соат 00:40 да Бухоро шаҳрида яшовчи Азамат исмли фуқарога тегишли Damas эшигини ҳам очиб, ундан нархи 100 минг сўмлик кўзойнакни ўғирлаган.
Олиб борилган тезкор ҳаракатлар ҳамда тергов олди текширувлари жараёнида гумон қилинувчилар қўлга олинган. Ўғирланган 500 Россия рубли, ҳамён, кўзойнак ашёвий далил сифатида расмийлаштирилган.
Мазкур ҳолат юзасидан Бухоро шаҳри бўйича ИИО ФМБ 1-сон ИИБ Тергов гуруҳи томонидан Жиноят кодексининг 169-моддаси 3-қисми «а» банди (Жуда кўп миқдорда ўғрилик) билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
Изоҳ (0)