Сурхондарё вилояти Денов туманида деҳқон бозорида Д.Т. исмли аёлнинг 8 миллион сўм пулини ўғирлаган 19 ёшли муқаддам судланган B.А. ва унинг шерикларининг кирдикорлари фош қилинди. Бу ҳақда Тергов департаменти хабар қилган.
Хабарга кўра, жиноят 2020 йилнинг 16 март куни соат 15:30 да Деновдаги деҳқон бозори ҳудудида содир этилган. Бир неча марта судланган 19 ёшли B.А. танишлари 21 ёшли М.Й (аёл), 20 ёшли Н.К. (аёл) ва 40 ёшли Ф.М. (аёл) билан жиноий тил бириктириб, Чағаниён кўчасида жойлашган деҳон бозорида фуқаро Д.Т.нинг сумкасидаги пулларни ўғирлаган.
B.А. тузган режа бўйича Ф.М., М.Й, Н.К. ва вояга етмаган С.Ғ. жабрдийданинг одамлар кўп бўлган жойга борганлигидан фойдаланиб, уни ҳар ёнидан ўраб олган. B.А. ўзи билан бирга олиб келган ўткир кесувчи жисм билан Д.Т.нинг сумкасини кесиб, сумка ичида бўлган жами 8 000 000 сўм пулларини яширин равишда ўғирлаб, жиноий шериги М.Й.га бериб, ҳодиса жойидан яширинган.
Олиб борилган тезкор-қидирув натижасида жиноятни содир этган шахсларнинг барчаси ушланган. 8 миллион сўм пул ашёвий далил тариқасида ҳужжатлаштирилиб олинган.
Мазкур ҳолат юзасидан Денов тумани ИИБ ҳузуридаги Тергов бўлими томонидан Жиноят кодексининг 169-моддаси 2-қисми «в» банди (Бир гуруҳ шахслар томонидан олдиндан тил бириктириб содир этилган ўғрилик) билан жиноят иши қўзғатилган.
Жиноят иши бўйича B.А. ва бошқаларга айблов эълон қилинган. B.А.га нисбатан қамоққа олиш эҳтиёт чораси қўлланилган, қолган айбланувчиларга эса қамоқ билан билан боғлиқ бўлмаган бошқа эҳтиёт чораси қўлланилиб, жиноят ишига алоқадор далиллар, айблов хулосаси билан туман прокуратурасига юборилган.
Июль ойи давомида Андижонда Captiva’ни таъқиб қилиб, машина ичидагиларни калтаклаган ва уларнинг 500 АҚШ долларини олиб қочган тўрт нафар шахс ушлангани, Андижон вилояти Асака туманида тўрт нафар йигит 17 ёшли ўсмирнинг йўлини тўсиб, унинг ёнида бўлган 430 минг сўм пулини олиб қўйгани ва қамоққа олингани, Бухоро вилоятида жиноий гуруҳ сифатида товламачилик, ўғирлик, фирибгарлик жиноятларини содир этган ва танишларининг пуллари ҳамда буюмларини талон-торож қилган жиноий гуруҳ фаолияти фош қилингани, Тошкент вилояти Қуйи Чирчиқ туманида 25 майдан 26 майга ўтар кечаси 30 ёшли аёлнинг уйига ўғирликка тушган шахс ушлангани ҳақида хабарлар берилган.
Изоҳ (0)