АҚШда федерал даражадаги жиноят учун қатл қилинган жиноятчи ўлими олдидан бу ишни қилмагани ва бегуноҳлигини айтди

АҚШда 13 июль куни 2003 йилдан бери илк бора федерал қамоқхонада ўлим жазоси ижро қилингани ҳақида хабар берилганди. AP нашри маҳбус 47 ёшли Даниэль Льюис Лининг ўлими олдидан ҳам айбдор эмаслигини айтиб вафот этганини маълум қилди.

Индиана штатидаги федерал қамоқхонада 1999 йили бир нечта моддалар, хусусан, Арканзасда уч кишидан иборат оилани ўлдирган жиноятчига тайинланган жазо ҳукми ижро қилинган.

Ap’нинг қайд этишича, Ли — ультраўнглар гуруҳи аъзоси бўлган. Қатл қилиниши олдидан: «Мен бу ишни қилмаганман. Сиз бегуноҳ одамни ўлдираяпсиз», — деган.

Федерал даражадаги жиноятлар учун (жумладан, гиёҳванд моддалар, қурол савдоси, болаларга нисбатан зўравонлик ва уларни ўғирлаш) ўлим жазоси тайинланиши ҳақида АҚШ адлия вазирлиги 2020 йил июнь ўрталарида маълум қилганди. Июль ва август ойларида яна уч жиноятчига нисбатан ўлим жазоси ижро қилинади.

2003 йилдан бери АҚШда ўлимга сабаб бўладиган инъекциялар қоидаларида келишилмаган жиҳатлар борлиги сабабли жиноятчини қатл қилиш жазоси амалга оширилмай келаётганди. Федерал даражадаги ўлим жазолари ҳукми чиқарилиши эса давом этаётганди.

АҚШнинг айрим штатларида ҳам штат даражасидаги жиноятлар учун ўлим жазоси тайинланади ва ижро қилинади. Death Penalty Information Center маълумотларига кўра, 2019 йилда ўлим жазоси Алабама, Жоржия, Теннесси, Флорида, Миссури, Жанубий Дакота штатларида ижро этилган. Деярли барча маҳкумлар (22 нафар) танага инъекция юбориш йўли билан ўлдирилган.

2019 йилдаги маълумотларга кўра, АҚШда 2600 дан ортиқ маҳбус ўлим жазосига ҳукм қилинган. Федерал доирада эса 62 кишига шундай жазо тури тайинланган.