Озарбайжон мудофаа вазирининг ўринбосари Керим Велиев Арманистон билан чегарада содир бўлган отишма оқибатида мамлакатнинг икки нафар юқори мансабдаги ҳарбийлари ҳалок бўлганини маълум қилди. Бу ҳақда «Vesti.az» нашри хабар тарқатган.
«Бугун тонгда генерал-майор Пўлат Гашимов, полковник Илгар Мирзаев қаҳрамонларча ҳалок бўлди», — деган Велиев.
Айни вақтда чегарадаги ҳарбий ҳаракатлар давом этмоқда.
«Афсуски жанглар йўқотишларсиз бўлмайди. Мудофаа вазирлиги раҳбарияти номидан ҳарбийларнинг вафоти муносабати билан уларнинг оила аъзоларига чуқур ҳамдардлик изҳор этаман. Ишонтириб айтаманки, бизнинг шаҳид кетган ўғлонларимиз ва яраланган аскарлар учун, албатта, қасос олинади», — дея таъкидлаган вазир ўринбосари.
Икки давлат қўшинлари ўртасидаги тўқнашув Озарбайжон шимоли-ғарбидаги Товуз вилояти ҳудудида 12 июлда содир бўлган. Озарбайжон Мудофаа вазирлиги Арманистонни ўт очиш ҳақидаги аҳдлашувни қўпол равишда бузганлик ва мамлакат артиллерияси жойлашган позицияга ҳужум қилганликда айбламоқда. Идора берган маълумотга асосан, иккала томонда ҳам жанг қурбонлари бор.
Арманистон Мудофаа вазирлиги эса Озарбайжон аскарларининг гуруҳи «УАЗ»да ҳеч бир сабабсиз мамлакат чегарасини бузиб киришга уринганини айтмоқда. Огоҳлантириш тарзидаги ўт очилганидан кейин ҳарбийлар автомобилни ташлаб, ўз позициясига қайтган, бироқ кейинчалик артиллерия ҳужумини уюштирган ва таянч пунктини эгаллашга уринган. Вазирлик ахбороти бўйича арман қисми талафот кўрмаган, Озарбайжон томонида қурбонлар бўлган.
13 июлда иккала томон ҳам бир-бирига такрорий тарзда яна ўт очган. Арманистон мудофаа вазирлиги матбуот котиби Шушан Степаняннинг айтишича, икки ёки уч соат давом этган танаффусдан кейин озарбайжонлик ҳарбийлар яна ҳужумга ўтган ва бунга муносиб жавоб қайтарилган. Расмий Боку берган маълумотга кўра, Озарбайжон артиллерияси, миномётлари ва танклари арман таянч пунктини вайрон қилган, ҳарбий техникани бузган ва аскарларни ҳам ҳалок этган.
Россия Ташқи ишлар вазирлиги мазкур низонинг бошланиши яхши оқибатларга олиб келмаслигини билдириб, иккала мамлакат ҳукуматларидан ўт очиш режимини бузмасликни сўраган. Вазирлик расмийси вазиятни барқарорлаштириш юзасидан кўмак беришга тайёрлигини қайд этган.
Евроиттифоқ ҳам қуролли тўқнашувларга барҳам беришни сўраган.
«Бу ўт очиш режимининг жиддий тарзда бузилиши ва Европада хавфсизлик ва ҳамкорлик ташкилоти шароит ўнгланганидан кейин бу борада тегишли мониторингни қайта ўтказиши лозим», — дейилади Европа ташқи сиёсат хизматининг баёнотида.
БМТ бош котиби Антониу Гуттериш Арманистон ва Озарбайжондан зудлик билан ҳарбий ҳаракатларни тўхтатишни талаб қилган.
Икки республика ўртасидаги низолар Совет Иттифоқи давлати парчаланганидан кейин бошланган. Тортишувларга Тоғли Қорабоғ ҳудуди сабаб бўлган, у ерда асосан арманлар яшайди ва 1991 йилда ҳудуд Бокудан мустақил эканини эълон қилган. 1992—1994 йилларда Озарбайжон ушбу ҳудудни қайтаришга уринган, бироқ якунда икки томон ўт очмаслик ҳақида аҳдлашув тузган ва у аввал ҳам бир неча марта шу йўсинда бузилган.
Изоҳ (0)