АҚШ фармацевтика компаниялари коронавирусга қарши вакцинани ёз охирларига бориб ишлаб чиқармоқчи. Бу ҳақда президент Дональд Трамп администрациясидаги манбасига таяниб Reuters хабар бермоқда.
Унга кўра, вакцина учун материалларни, тахминан, 4-6 ҳафтадан кейин ишлаб чиқариш бошланади.
Трамп администрацияси COVID-19’га қарши тўртта вакцинани ишлаб чиқаришни молиялаштиради. АҚШда 2021 йил якунигача 300 миллион доза вакцина ишлаб чиқариш режалаштирилган.
Reuters манбасининг айтишича, коронавирус инфекциясига қарши терапевтик препаратларнинг клиник синовлари бир неча ҳафта ичида ўз натижаларини бериши мумкин, бу эса кузгача юз минглаб дозаларни ишлаб чиқариш имконини беради.
Эслатиб ўтамиз, АҚШнинг коронавирус вакцинасини яратишни тезлаштириб, йил сўнгигача тайёр қилмоқчи эканлиги ҳақида апрель ойи охирларида Bloomberg хабар берганди. Агентлик бунинг учун фармацевтика компаниялари, давлат ва ҳарбий муассасалар кучларини бирлаштирувчи лойиҳа тайёрланаётганини маълум қилган.
«Биз бу борада фаол ишлаяпмиз», — деган эди Дональд Трамп май ойида Fox News телеканалига берган интервьюсида. Шунингдек, АҚШ президенти Америка компаниялари коронавирусга қарши вакцинани ишлаб чиқса, мамлакатнинг уни хориждаги бошқа давлатларга пуллаб даромад қилмоқчи эмаслигини маълум қилган.
Изоҳ (0)