Тожикистон ҳукумати 1992 йилдан буён Душанбе шаҳрида президент саройи сифатида фойдаланилган бинони бузиш ишларини бошлади, мазкур бино мамлакат мустақиллигидан аввал Тожикистон ССР компартияси марказий кенгашининг биноси бўлган. Бу ҳақда Asia-Plus хабар берди.
Тожикистон пойтахтида жойлашган мазкур бино 1957 йилда қурилган. Совет Иттифоқи даврида бинода Тожикистон ССР компартиясининг марказий кенгаши жойлашган.
Мамлакат мустақилликка эришганидан сўнг мазкур бинода 25 йил давомида президент аппарати ва ҳукумат фаолият олиб борган. 2016 йилда эса президент аппарати ва ҳукумат янги бинога кўчиб ўтган. Ҳозирги пайтда бу бинода Душанбе шаҳри мэрияси жойлашган. Мэрия мазкур бинога уч йил аввал Туризм қўмитаси билан бирга кўчиб ўтган.
Президентнинг собиқ саройи бузилиши пойтахтнинг бош режаси доирасида амалга оширилмоқда. 2020 йилнинг февраль ойида Душанбе шаҳри раисининг биринчи ўринбосари Маҳмадсаид Зувайзода бино бузилишга тушганини тасдиқлаган.
Бинонинг бузилиши унинг ўнг қанотидан бошланган. Шундан сўнг бинонинг марказий қисми ва чап қаноти бузилади.
Мазкур бино ўрнида Тожикистон ҳукумати биносини қуриш режалаштирилмоқда.
Изоҳ (0)