Дунёнинг 80 дан ортиқ энг бадавлат инсонлари кўпроқ солиқ тўлаб, жаҳон ҳамжамиятига коронавирусга қарши курашда ёрдам кўрсатиш таклифини билдирди.
Millionaires for Humanity («Инсоният учун миллионерлар») гуруҳи томонидан йўлланган мактубда ёзилишича, дунёда соғлиқни сақлаш тизимига инвестициялар етишмаслиги ҳамда касалхоналарда койка-ўринлар, ҳимоя ниқоблари ва сунъий нафас олдириш аппаратлари етишмаслиги муаммоси кузатилмоқда. Миллионерлар вазиятни тўғирлаш мақсадида зудлик билан, сезиларли даражада ва бутунлайга ўзлари учун солинадиган солиқ ставкасини кўтаришни таклиф қилмоқда.
«Биз тез ёрдам машиналарини ҳайдамаймиз. Биз озиқ-овқат маҳсулотлари дўконларини тўлдирмаймиз ва маҳсулотларни эшикларингиз тагига қадар етказиб бермаймиз. Бироқ бизнинг пулимиз бор, жуда кўп пулимиз», — дейди миллионерлар.
Мактубда таъкидланишича, миллионерлар дунёдаги бошқа ўн миллионлаб инсонлар каби ишсиз, уйсиз ва шахсий жамғармасиз қолишдан хавотирланмайди. Улар ўзлари учун инсоният тақдири муҳим эканлигини қайд этган.
Мактубга Буюк Британия, Дания, Канада ва Янги Зеландиядан бўлган 83 нафар бизнесмен имзо чеккан. Улар орасида Disney меросхўри Абигейл Дисней ва Американинг Ben&Jerry музқаймоқ компанияси эгаси Жерри Гринфилд ҳам бор.
Изоҳ (0)