Ўзбекистон Президенти Шавкат Мирзиёев 14 июль, сешанба куни бўлиб ўтган видеоселектор йиғилишида мамлакатда коронавирусни аниқлаш тестини ўтказиш тартибини соддалаштириш бўйича топшириқ берди. Бу ҳақда Президент матбуот хизмати хабар қилди.
Фото: Президент матбуот хизмати
Қайд этилишича, таҳлиллар коронавирус билан зарарланишнинг олдини олиш, касалликни эрта аниқлаш, симптомсиз ва енгил кечаётган беморлар билан олиб борилаётган даволаш ва назорат тадбирларини амалга оширишда янги стратегияларни қўллашни талаб қилмоқда.
Мавзуга доир: Шавкат Мирзиёев: Коронавирусга қарши кураш учун бизда барча захира ва имкониятлар мавжуд
Шу сабабли, Шавкат Мирзиёев Республика махсус комиссияси бу борада тезлик билан барча зарур чора-тадбирларни ишлаб чиқиши ва амалга ошириши бўйича кўрсатма берди.
Шунингдек, бош вазир ўринбосари Беҳзод Мусаев, соғлиқни сақлаш вазири Алишер Шодмоновга бир кун муддатда амалдаги тест-таҳлил топшириш жараёнини қайта кўриб чиқиш, аҳоли учун қулай тизимни ишлаб чиқиш топшириғи берилди.
Фото: Президент матбуот хизмати
Аввалроқ журналист Барно Султонова Тошкент шаҳридаги Санитария-эпидемиологик-осойишталик марказларидаги коронавирусга тест топшириш билан боғлиқ муаммолар ҳақида маълум қилганди.
Коронавирусга қарши кураш штаби аъзоси, профессор Ҳабибулла Оқилов касалланиш ҳолатларининг кўпайиши ҳисобидан ҳозирги кунда кунига жами 20-22 минг таҳлил қилинаётганини ва таҳлиллар бўйича талаб қондирилмаётганини айтганди. Шунингдек, Ҳабибулла Оқилов фуқаролардан ўзингизни овутиш мақсадида тест таҳлили топширишга ҳаракат қилмасликни сўради.
Twitter фойдаланувчилардан бири Ўртасаройда ўтган 15 кунини ҳикоя қилган эди. Шунингдек, Соғлиқни сақлаш вазирлиги томонидан «вақтида мурожаат қилмай, уйида даволанган» деб айтилган беморнинг яқини касалхоналар COVID-19’дан вафот этган марҳум беморни бир неча бор қабул қилмаганини сўзлаб берди.
