O‘zbekiston Prezidenti Shavkat Mirziyoyev 14-iyul, seshanba kuni bo‘lib o‘tgan videoselektor yig‘ilishida mamlakatda koronavirusni aniqlash testini o‘tkazish tartibini soddalashtirish bo‘yicha topshiriq berdi. Bu haqda Prezident matbuot xizmati xabar qildi.
Qayd etilishicha, tahlillar koronavirus bilan zararlanishning oldini olish, kasallikni erta aniqlash, simptomsiz va yengil kechayotgan bemorlar bilan olib borilayotgan davolash va nazorat tadbirlarini amalga oshirishda yangi strategiyalarni qo‘llashni talab qilmoqda.
Mavzuga doir: Shavkat Mirziyoyev: Koronavirusga qarshi kurash uchun bizda barcha zaxira va imkoniyatlar mavjud
Shuningdek, bosh vazir o‘rinbosari Behzod Musayev, sog‘liqni saqlash vaziri Alisher Shodmonovga bir kun muddatda amaldagi test-tahlil topshirish jarayonini qayta ko‘rib chiqish, aholi uchun qulay tizimni ishlab chiqish topshirig‘i berildi.
Avvalroq jurnalist Barno Sultonova Toshkent shahridagi Sanitariya-epidemiologik-osoyishtalik markazlaridagi koronavirusga test topshirish bilan bog‘liq muammolar haqida ma’lum qilgandi.
Koronavirusga qarshi kurash shtabi a’zosi, professor Habibulla Oqilov kasallanish holatlarining ko‘payishi hisobidan hozirgi kunda kuniga jami 20-22 ming tahlil qilinayotganini va tahlillar bo‘yicha talab qondirilmayotganini aytgandi. Shuningdek, Habibulla Oqilov fuqarolardan o‘zingizni ovutish maqsadida test tahlili topshirishga harakat qilmaslikni so‘radi.
Twitter foydalanuvchilardan biri O‘rtasaroyda o‘tgan 15 kunini hikoya qilgan edi. Shuningdek, Sog‘liqni saqlash vazirligi tomonidan “vaqtida murojaat qilmay, uyida davolangan” deb aytilgan bemorning yaqini kasalxonalar COVID-19’dan vafot etgan marhum bemorni bir necha bor qabul qilmaganini so‘zlab berdi.
Izoh (0)