ПСЖ ҳужумчиси Эдинсон Кавани Англия терма жамоасининг собиқ сардори Дэвид Бекҳэмга тегишли бўлган «Интер Майами» (MLS) клубига ўтишдан бош тортди, дея хабар бермоқда Calciomercato.
Фото: AP Photo
Таъкидланишича, Америка клуби вакиллари сўнгги ҳафталарда Кавани билан боғланиб, унинг MLS’га келиш истаги бор, йўқлиги ҳақида сўраган ва Каванига ПСЖда оладиган маошини (йилига 12 миллион евро) таклиф қилган. Бироқ уругвайлик форвард Европада қолиш истагини билдириб, рад жавобини берган.
Ҳозирда Каванига асосий даъвогар «Рома» бўлиб турибди, Италия клуби июнь ойида унга 3 йиллик шартнома ҳам таклиф қилганди, бироқ римликларга футболчининг юқори маоши муаммо туғдириши мумкин.
Маълумот учун, Кавани 2013 йилнинг ёзидан бери ПСЖ шарафини ҳимоя қилиб келади. У Париж клуби сафида умумий ҳисобда 301 та ўйин ўтказиб, 200 та гол урган ва 43 та голга ассистентлик қилган. 33 ёшли уругвайлик футболчининг клуб билан шартномаси 1 июль санасида тугаб бўлган, аммо томонлар шартномани мавсум охиригача узайтиришга келишиб олди.
