10-iyul kuni Turkmaniston prezidenti Gurbanguli Berdimuhamedov Qozog‘iston Xavfsizlik kengashi raisi Nursulton Nazarboyev bilan telefon orqali muloqot qildi. Bu haqda “Xronika Turkmenistana” nashri xabar tarqatgan.
Telefondagi suhbatda Berdimuhamedov Nazarboyevni 6-iyulda 80 yoshga to‘lgani bilan tabriklagan. Shuningdek, Turkmaniston prezidentining so‘zlariga ko‘ra, u rahbarlik qilayotgan mamlakat xalqi Yo‘lboshchi Nursulton Nazarboyevning koronavirusdan tuzalgani, Qozog‘istondagi bunyodkorlik faoliyati uchun yana iroda hamda matonat namoyish etganidan xursand.
Muzokaralarning asosiy mavzusi COVID-19 pandemiyasi va epidemiologik sohalar bo‘yicha o‘zaro hamkorlik masalalari bo‘ldi.
Berdimuhamedov koronavirusning paydo bo‘lishi va tarqalishining sabablarini o‘rganish bo‘yicha ikki davlat olimlarining hamkorligidan manfaatdor ekanini ta’kidlagan.
“Turkmenistan Segodnya” davlat axborot agentligining xabariga ko‘ra, Turkmaniston tomoni “viruslar havo oqimlari orqali ko‘chib yurishi mumkin” va bu Orol dengizidagi ekologik muammo bilan bog‘liq ravishda kechadi.
Agentlik xabarida pandemiya va Orol dengizi muammosining bir-biriga aloqadorligi borasida aniq ma’lumot berilmagan.
“Inson sog‘lig‘iga xavf soluvchi viruslar og‘ir ekologik sharoitda havo oqimlari orqali harakatlanishi mumkin. Markaziy Osiyo ekologik nuqtayi nazardan o‘ta og‘ir mintaqalardan biri hisoblanadi. Bunga asosiy sabablardan biri Orol dengizidagi muammo.
Orol dengizi atrofidagi zararli havo tabiatga, geografik hududlardagi iqlimga jiddiy ziyon keltirmoqda va nafaqat ushbu hududda yashovchi balki undan nariroqdagi boshqa mamlakatlardagi odamlar hayotiga ham xavf solmoqda”, – deyiladi agentlik xabarida.
JSST COVID-19’ning havoda shamol orqali kelishi mumkinligi haqida xabar bermagan. BMT rasmiy saytidagi ma’lumotga asosan, koronavirus odam yo‘talganidan yoki aksa urganidan keyin muayyan vaqt davomida yopiq binolardagi havoda saqlanib turishi mumkin. Biroq katta masofaga cho‘zilgan ochiq havodagi kengliklarda (o‘nlab-yuzlab kilometr masofaga cho‘zilgan) havodagi infeksiya zarrasining kuchi yo‘qoladi.
Turkmaniston TIV 7-iyulda ilk bora koronavirusning Orol bo‘yidagi shamollar va tuz bo‘ronlari oqibatida yuqishi mumkinligi haqida xabar tarqatgan, shu kuni JSSTning missiyasi mamlakatda tekshiruv ishlarini amalga oshirgandi.
Tekshiruvga bir necha kun qolganidan xizmat ko‘rsatish sohasi xodimlari tibbiyot niqoblarini taqib ishlashni boshlagan, Turkmaniston davlat OAV sog‘liqni saqlash vazirligi buni havodagi chang miqdori keskin oshgani bilan izohlayotganini ma’lum qilgandi.
“Meteojurnal” meteorologik nashri Turkmanistondagi qurilmalar axborotiga asoslangan holda ushbu gap-so‘zlarni inkor etgan.
Avval Turkmaniston poytaxtida tibbiy niqoblar narxi bir haftada 14 baravar oshgani, avvalroq iyun oyi oxirlarida Ashxoboddagi kasalxona xodimlarida koronavirus aniqlangani haqida mish-mishlar tarqalgani haqida xabarlar berilgan.
Izoh (0)