Ўзбекистонда коронавирус инфекциясига чалинган беморлар орасидаги 60-ўлим ҳолати қайд этилди

Тошкентда коронавирус инфекциясига чалинган 65 ёшли М.Х. исмли аёл вафот этди. Бу ҳақда Соғлиқни сақлаш вазирлиги хабар қилган.

ССВ хабарига кўра, Олмазор туманида яшовчи 65 ёшли М.Х.да сўнгги икки ҳафтада тана ҳароратининг кўтарилиши, ҳолсизлик, йўтал кузатилиб, у уйида даволанган. Тана ҳарорати тушмагач, COVID-19 инфекциясига намуна топширган.

Бемор Зангиота туманидаги юқумли касалликлар шифохонасига ётқизилган. Унга COVID-19 инфекциясининг оғир кечиши, икки томонлама пневмония, нафас ва ўткир юрак қон-томир етишмовчилиги ташхиси қўйилган.

Шунингдек, М.Х. юрак ишемик касаллиги, гипертония, артериал гипертензия ҳамроҳ касалликлар билан ҳам оғриган. Шифохонада беморнинг даволаниши давомида шифокорлар томонидан онлайн консултация ва консилиумлар қилинган, даволаш жараёни мутахассислар тавсияси асосида олиб борилган.

Бироқ шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир нафас ва юрак қон-томир етишмовчилигидан вафот этди.

65 ёшли М.Х. коронавирус билан касаллангани аниқланган ва инфекция асоратлари оқибатида вафот этган 60-бемор бўлди. Бунгача Ўзбекистонда 59 киши коронавирус инфекцияси асоратлари оқибатида вафот этгани хабар қилинганди.

Ўзбекистонда 12 июль соат 17:00 ҳолатига кўра коронавирусга чалинганлар сони 12 855 нафарга етган.