Олий Мажлис Қонунчилик палатаси депутати Мадина Баратова уч кундан буён коронавирусга топширган тести жавобини ололмаётгани ҳақида Telegram’даги каналида пост ёзди.
Уч кундан бери коронавирусга топширган тестимнинг натижасини ололмаяпман...Аввал Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов коронавирус инфекцияси билан касалланганини маълум қилган, кейинроқ Адлия вазири маслаҳатчиси, блогер Шаҳноза Соатова коронавирусга оилавий чалингани ва COVID-19’га тест топшира олмаётганини билдирган.Коронавирус пандемияси хатари аллақачон мамлакатимизга кириб келди. Кимдир бефарқ, кимлардир ўзини-ўзи ҳимоялаш учун уйдан чиқмайди. Аммо давлатимиз, Президентимиз, мутасаддилар кун-у тун шу хавф учун курашиш йўлларини, даво чораларини топиш мақсадида ҳаракатдалар.
Албатта, бу вазиятда энг тўғри йўл – уйда қолиш!
Фаолиятимиз нуқтаи назаридан халқ орасидамиз. Истаймизми-йўқми, турфа одамлар билан мулоқотда бўламиз. Демак, пандемияга қарши текширувдан ўтиш вақт тақозоси биз учун. Аммо...
Уч кундан бери санитария-эпидемиология маркази шаҳар бўлимига қўнғироқ қилиб, COVID-19 учун топширган тестнинг натижаларини ололмай ҳалакман. Ҳар сафар вилоят санитария-эпидемиология марказидан жавоблар ҳали келмаганини рўкач қилишаверганидан, очиғи, зада бўлдим. Вилоят «СЭС» раҳбари эса «қизлар» (ходимлар)га айтиб қўйганини такрорлашдан, қизлар эса фамилиямизни топишолмаётганини таъкидлашдан, биз эса улар айтганидек, «Керак бўлса кутасиз», «Ман билмайман» деган мантиқсизгина жавобларни олишдан чарчадик рости...
Ахир айни вазиятда мана шундай баҳоналарга ўрин борми?! Аслида бугунги машаққатли ва синовли палла аввалгидан тезкорликни, аввалгидан хушёрликни, аввалгидан огоҳликни талаб қилмаяптими?! Билмаслик, билишни истамаслик, билишга ҳаракат қилмаслик, вазиятни бошқаролмаслик, иш кўламининг кўпайгани баҳона бўла олмайди! Инсонларнинг соғлиги ва ҳаёти олдида бизга аллақандай важларни рўкач қилаётган мутасаддининг иш кўлами кўпайгани баҳонаси тўғрими? У айтгандай «мода» учун эмас, аслида зарурлиги учун тест топширган инсонлар учун бошқарувни қўлга олиши, эгаллаб турган лавозимига тегишли бўлган ахборотларни билиши шарт!
Тест натижаларини вақтида ололмай ўзбошимчалик билан даволанган бемор соғлиғи ва тест натижаларини кутиб вақтида даволана олмаган бемор ҳаёти учун жавобгарликка шу қадар масъулиятсизлик билан қараладими?
Шу ўринда кўрганларим, гувоҳи бўлганларим айни кундаги соҳага алоқадор бундай лоқайдликлар ҳанузгача Соғлиқни сақлаш тизимининг қуйи бўғинларида урчиб ётганига ачинаман. Давлатимиз томонидан яратилаётган имкониятлар, биз депутатларнинг ўрганишлари, муаммоларига ечим топишлари бир ён-у, бефарқлик илдизига болта уролмаётганимиз бир ён бўлаётгани афсусланарли...
Эҳтимол, қуйи тизимлар фаолиятини янада чуқурроқ таҳлил қилиш зарурми?!..
Бу борада вилоят санитария-эпидемиология марказидан расмий жавоб кутаман!
Мадина Баратова, Олий Мажлис Қонунчилик палатаси депутати.
Изоҳ (0)