Швейцариянинг Женева шаҳрида 7 июль куни Ўзбекистоннинг Жаҳон савдо ташкилоти (ЖСТ)га кириши бўйича ишчи гуруҳининг 4-йиғилиши бўлиб ўтди, деб хабар бермоқда Инвестициялар ва ташқи савдо вазирлиги матбуот хизмати. Коронавирус туфайли йиғилиш видеоконференция шаклида ўтказилган.
Ўзбекистоннинг ЖСТга аъзо бўлиши бўйича ишчи гуруҳ 1998 йилда ташкил этилган эди. Кейинги йилларда ушбу ишчи гуруҳ фақат уч марта учрашди ва 2005 йилларнинг ўрталарига келиб бу борада халқаро экспертлар билан учрашувлар тўхтаб қолганди.
Февраль ойида Ўзбекистон Ташқи ишлар вазирлиги ишчи гуруҳнинг тўртинчи йиғилиши март ойи охирлари, апрель ойи бошларида бошланишини кутганди. Бироқ пандемия туфайли бу учрашувни ўтказишнинг имкони бўлмади.
7 июль куни бўлиб ўтган ишчи гуруҳнинг тўртинчи йиғилишида Ўзбекистон делегациясига бош вазир ўринбосари — инвестициялар ва ташқи савдо вазири Сардор Умрзоқов бошчилик қилган.
«Гибрид формат»да, махсус онлайн платформада ташкил этилган тадбирда ташкилотнинг Женевадаги штаб-квартира биносида туриб иштирокчи давлатларнинг делегациялари бевосита, бошқа иштирокчилар эса жумладан, турли давлатларнинг пойтахтларидан экспертлар — видеоконференцалоқа орқали иштирок этди.
«Йиғилиш якунида жорий йилнинг 20 июлидан 31 июлига қадар товар ва хизматларнинг бозорга киришини таъминлаш масалалари бўйича икки томонлама музокаралар ўтказишга келишиб олинди», — дейилади хабарда. Шунингдек, ЖСТга кириш бўйича музокараларнинг кейинги босқичига ўтиш, хусусан, Ўзбекистон ташкилотга кириши бўйича ишчи гуруҳ маърузасининг асоси ҳисобланган фактологик хулосани тайёрлаш тўғрисида келишувга эришилган.
Қайд этилишича, ЖСТ бош директори ўринбосари Алан Вульф ташкилот котибияти фаолиятининг устувор йўналишларидан бири мамлакатларга ЖСТга киришда кўмаклашиш эканлигини таъкидлади ва шу сабабли Ўзбекистоннинг ташкилотга аъзо бўлиш жараёнини тиклаш тўғрисидаги қарорини олқишлади ва ташкилот раҳбарияти номидан ушбу ташаббусда барча зарур ёрдамни кўрсатишга тайёрлигини билдирган.
Шунингдек, қўшимча қилинишича, бир қатор бошқа давлатлар, минтақавий ва тематик гуруҳларнинг вакиллари Ўзбекистоннинг ЖСТга киришини қўллаб-қувватлашга қаратилган фикрларини баён қилган.
Эслатиб ўтамиз, республиканинг ЖСТга аъзо бўлиш жараёни 2019 йил июль ойида Ўзбекистон мазкур ташкилотга аъзо бўлиш учун ташқи савдо режими тўғрисидаги янгиланган меморандумни кўриб чиқишга тақдим этган пайтда бошланган эди. Ўзбекистоннинг ЖСТга аъзо бўлиши жараёнининг давом эттирилиши Шавкат Мирзиёев томонидан 2017—2021 йилларда Ўзбекистоннинг Ҳаракатлар стратегиясида давлатнинг савдо-иқтисодий соҳасида ривожланишнинг устувор йўналишларидан бири сифатида белгиланган.
Изоҳ (0)