Қашқадарёда отаси алимент тўламагани сабабли Россияда чиқинди йиғиб юрган 11 ёшли боланинг онасига алимент пуллари ундирилиб, унинг қонуний ҳуқуқлари тикланди. Бу ҳақда «Kun.uz» хабар бермоқда.
Маълум бўлишича, фуқаролик ишлари бўйича Қарши туманлараро судининг 2019 йил 28 декабрдаги суд буйруғига асосан, қарздор Б.С.дан ундирувчи Ш.Ж.нинг фойдасига икки нафар вояга етмаган фарзандларининг моддий таъминоти учун алимент ундириш тўғрисидаги ижро ҳужжати МИБнинг Қарши туман бўлимига шу куни келиб тушган.
Қарздорнинг мол-мулкларини аниқлаш мақсадида тегишли ташкилотларга сўровномалар юборилиб, жавоб хатлари олинганда қарздорнинг ундирув қаратилиши мумкин бўлган мол-мулклари аниқланмаган.
Ижро ҳаракатлари давомида 2020 йил 13 март куни қарздордан 340 минг сўм ундирилган. Ижро ишидаги ҳужжатларга кўра, қарздор алиментни ўз вақтида тўлаши ҳақида, тўламаган тақдирда тегишли жавобгарликка тортилиши ҳақида огоҳлантирилиб келинган.
Бироқ қарздор алимент пулларини ўз вақтида тўламай келганлиги сабабли давлат ижрочиси томонидан 2020 йил 15 июнда алимент қарзини ҳисоблаш тўғрисида қарор чиқарилган ва қарздорлик 2019 йил 29 декабрдан 15 июнгача 5 270 808 сўм ҳисобланган.
Маълумот учун, 11 яшар Исломбек онаси ва опасини боқиш учун Москвадаги чиқиндихоналарда ишлаб юргани акс этган видео июнь ойининг ўртларида ижтимоий тармоқларда тарқалганди. Унинг онаси турмушдан ажрашганидан сўнг алимент пулини ундира олмаган, уй-жойдан қийналгани учун Россияга келишга мажбур бўлганини билдирган. Видео ижтимоий тармоқларда тарқалгач, кўплаб одамлар бу оилага ёрдам қўлини чўзган ва улар Ўзбекистонга қайтиб келган.
Изоҳ (0)