Андижон вилоятининг Марҳамат туманидаги «Алитепа» маҳалласида тадбиркор Қобилжон Обидов ташаббуси билан қад ростлаган Эркин Воҳидов номидаги шахмат мактаби фойдаланишга топширилди. Бу ҳақда «Дарё» мухбири Умиджон Мамарасулов хабар берди.
Тадбиркор томонидан ёшларнинг бўш вақтини самарали ўтказиш мақсадида барпо этилган спорт масканининг лойиҳа қиймати 4 миллиард 300 миллион сўмни ташкил этади.
Замонавий шароитларга эга муассасада шахмат ҳамда волейбол спорти бўйича машғулотлар йўлга қўйилган бўлиб, мактабда бир вақтнинг ўзида 150 нафарга яқин ўқувчи таҳсил олиши мумкин. Мактаб қошида, шунингдек, шахмат ҳамда волейбол музейлари ташкил этилган. Музейдан шахмат ва волейбол тарихи, ушбу йўналишда хизмат кўрсатган спорт усталари, жаҳон чемпионатларида иштирок этган марҳаматлик спортчилар ҳақида маълумотлар, суратлар ҳамда соҳага оид мингга яқин китоб жой олган.
Мактаб директори Нажмиддин Умаровнинг айтишича, мактабга нафақат туман, балки вилоятнинг барча ҳудудларидан ўқувчиларни жалб қилиш режалаштирилган. Шахмат залида бир вақтнинг ўзида 100 нафар ўқувчи машғулотда иштирок этиши мумкин.
Мактаб биносининг очилиш маросимида сўзга чиққан вилоят ҳокими Шуҳрат Абдураҳмоновнинг айтишича, тадбиркор ушбу спорт мактабини тўлиқ давлат тасарруфига ўтказиб беришини маълум қилган.
Вилоят ҳокимининг қўшимча қилишича, тадбиркор 2018 йил қуриб битказилган 150 ўринли «Болалар академияси» номли нодавлат мактабгача таълим муассасасини ҳам тўлиқ давлат тасарруфига ўтказиб берган.
Изоҳ (0)