Икки заправка орасида клиника қуришга рухсат берган Қарши шаҳар ҳокими иши судда кўрилмоқда

Қарши шаҳар ҳокими Нормўмин Холбоев икки заправка орасида хусусий клиника қуришга рухсат берганди. Автомобильларга ёнилғи қуйиш шохобчаси мулкдори, тадбиркор Бахтиёр Раҳимов шаҳар ҳокимининг ушбу қароридан норози бўлиб, судга мурожаат қилди.

2020 йилнинг 7 июль куни бўлиб ўтган суд мажлисида қатнашган «Дарё» мухбирининг хабар беришича, Қарши шаҳар Маъмурий суди судьяси ҳокимнинг суд томонидан ҳақиқий эмас деб топилган қарорни қонунга мувофлаштирганига таажжубланган.

«Суд томонидан ҳақиқий эмас деб топилган қарорни Қарши шаҳар ҳокими қандай қилиб қонунга мувофиқлаштирган?», — дея савол билан юзланган судья шаҳар ҳокимлиги ҳуқуқшуноси Зуфар Исмоиловдан тайинли жавоб ололмади.

Судда сўз олган Қарши шаҳар ҳокимлиги ҳуқуқшуноси Зуфар Исмоилов вилоят фавқулодда вазиятлар бошқармаси шаҳар ҳокимлигига хулоса хати берганлигини, унда «Таъминот савдо сервис» МЧЖ раҳбарлигидаги автомобилларга ёнилғи қуйиш шохобчаси омбори атрофи девор билан ўраб олинса, оралиқ масофа тўғри келиши мумкин, деган тўхтамга келинганини айтди.

Судда иштирок этган ва исм-фамилияси ОАВда ошкор этилишини истамаган Artro-Med хусусий клиникаси масъули ёнилғи қуйиш шохобчаси муҳофаза майдонида қурилиши бошланган хусусий клиника учун айни кунга қадар 1 миллиард 200 миллион сўм маблағ сарфланганини, шу боис ҳам заправка эгаси билан келишиб, муаммони бартараф қилиш ниятидалигини маълум қилди.

Заправканинг ёнилғи омборини вилоят фавқулодда вазиятлар бошқармаси айтган талаб бўйича ўраб, ўз ҳисобимиздан девор қуриб берамиз ва ўртада 25 метр масофа қолдирамиз», — деди Artro-Med хусусий клиникаси вакили.

Мазкур таклифни эшитган тадбиркор Бахтиёр Раҳимов бунга розилигини, бироқ ёнилғи қуйиш шохобчаси ёнидан қолдирилаётган 25 метр масофа шаҳар ҳокими қароридан ҳам чиқарилишини ва қонунан тасдиқланишини сўрамоқда.

Таъкидлаш жоиз, Қарши шаҳар ҳокимининг 2020 йил 3 июлдаги қарорида Artro-Med хусусий клиникаси учун 40 сотих ер берилгани ёзилган бўлиб, тадбиркорнинг айтишича, қолдирилиши айтилаётган 25 метр масофа ана шу қарор таркибидан чиқарилмаса, келажакда яна низога сабаб бўлиши мумкин.

Эслатиб ўтамиз, аввалроқ «Дарё»да мазкур муаммо тилга олинган бўлиб, хусусий клиника автомобилларга ёнилғи қуйиш шохобчасининг 80 минг литрдан ортиқ ёнилғи сақланувчи омбори томонидан қолдирилган муҳофаза майдонида қад ростлаётгани, тадбиркор Бахтиёр Раҳимов эса бундан ташвишланаётгани ҳақида сўз юритилганди.

Суд 10 июль, жума куни соат 16:00 га қадар танаффус эълон қилди.