Ўзбекистонда коронавирус билан боғлиқ ўлим ҳолатлари нега кечикиб эълон қилинаётганига изоҳ берилди

Соғлиқни сақлаш вазирлиги ҳузуридаги Коронавирусга қарши кураш штаби коронавирус билан боғлиқ ўлим ҳолатлари ҳақидаги хабарлар нега кечикиб эълон қилинаётганига изоҳ берди.

Жумладан, «Дарё» мухбири ўлим ҳолатлари ҳақидаги хабарлар баъзан ўша куни, баъзан эса икки кундан кейин эълон қилинаётганига Навоий вилоятида банк ходимининг вафот этиши аввал вилоят ҳокимлиги, сўнг Соғлиқни сақлаш вазирлиги томонидан маълум қилинганини мисол тариқасида келтирди.

Республика ихтисослаштирилган Эндокрионология илмий-амалий тиббиёт маркази директори Анвар Олимовнинг сўзларига кўра, Махсус комиссиянинг қарори бўйича 5 июлгача бўлган муддатда ҳар бир касалликнинг ташхисини тасдиқлаш Тошкент шаҳридаги референс лабораториядан ўтмагунича рўйхатга олинмаган. Рўйхатга олинганларнинг тузалганидан сўнг таҳлили худди шу лабораторияларда тасдиқланмагунича касаллар рўйхатидан чиқарилмаган. Бироқ 5 июлдан бошлаб вилоят Санитария-эпидемиологик осойишталик агентлиги раҳбарига ташхис қўйиш, яъни PSR диагностикаси бўйича олинган маълумот асосида ташхис қўйишга рухсат берилган. Бемор даволанганидан сўнг PSR диагностикаси бўйича натижалар тузалганини қайд этган ҳолда вилоят Санитария-эпидемиологик осойишталик агентлиги раҳбарининг ўзига берилган.

Мутахассис Навоийнинг Зарафшон шаҳрида нафақат PSR, балки референс лаборатория ҳам қўйилганини қайд этди. Тошкент шаҳридан сўнг республикада иккинчи саналган ана шундай лабораторияда эндиликда таҳлиллар бўйича диагностика қилиш ҳуқуқи мавжуд.

Айни ҳолат бўйича Соғлиқни сақлаш вазирлиги ҳузуридаги Коронавирусга қарши кураш штаби аъзоси, профессор Ҳабибулла Оқилов ҳам ўз изоҳини бериб ўтган. Оқилов Ўзбекистонда бугунга келиб вафот этган 42 нафар беморнинг ҳаммаси ҳам коронавирусдан ҳалок бўлмаганини таъкидлади.

«Айнан соппа-соғ одамга коронавирус юқиб, унинг асоратларидан ўлганларни санайдиган бўлсак, 2, 3, 4 нафардан ошмайди. Вафот этганларнинг аксариятида эскитдан сурункали касал, ортиқча вазн, эндокринологик муаммолар, қандли диабет, гипертония, қон касалликлари, юрак-қон томир тизими касалликлари бўлган. Нечтаси коронавирус юқтирган-у, лекин инфаркт, ўткир инфаркт-миокардидан вафот этган».

Шунингдек, мисол тариқасида, бемор клиникага келиб тушган куни инфарктдан вафот этган бўлса ҳам, коронавирусга таҳлил олиниши, аммо жавоби келмагунича айнан нима ўлимга сабаб бўлгани маълум қилинмаслиги билдирилди. Жавоби келгунича бўлган фурсатда вақт чўзилиши мумкинлиги айтилди.