Ахборот ва оммавий коммуникациялар агентлигида Республика махсус комиссиясининг мамлакатда карантин чораларини кучайтириш бўйича ахбороти юзасидан 8 июль, чоршанба куни матбуот анжумани бўлиб ўтди.
Давлат тест марказининг хабар беришича, мазкур матбуот анжуманидан сўнг турли манбаларда давлат олий таълим муассасаларининг бакалавриат таълим йўналишларига кириш имтиҳонлари онлайн бўлиши мумкинлиги ҳақида хабарлар тарқалди.
ДТМ томонидан таъкидланишича, Ўзбекистон Президентининг 2019 йил 14 майдаги «Олий таълим муассасаларига тест синовлари орқали қабул қилиш тизимини такомиллаштириш бўйича қўшимча чора-тадбирлар тўғрисида»ги ПҚ-4319-сонли қарорига мувофиқ, олий таълим муассасаларининг бакалавриат таълим йўналишларига мос тест синови топшириладиган фанлар мажмуаси, баҳолаш мезонлари, тест топшириқлари сони ҳамда тест синовларини ўтказишнинг аниқ муддатлари Ўзбекистон таълим муассасаларига ўқишга қабул қилиш бўйича Давлат комиссияси томонидан белгиланади.
Ҳозирги кунда Давлат тест маркази томонидан тест синовларини ҳар йилги шаклда, катта сиғимли биноларда, санитария-гигиена талабларига риоя этилган ҳолда ўтказиш бўйича тайёргарлик ишлари олиб борилмоқда.
«Давлат олий таълим муассасаларининг бакалавриат таълим йўналишларига кириш имтиҳонларини ўтказиш тартиби ўзгармаган», — дейилади ДТМ баёнотида.
Эслатиб ўтамиз, 2020/2021-ўқув йили учун абитуриентларнинг ҳужжатлари ДТМ сайти ва Ягона интерактив давлат хизматлари портали орқали қабул қилинмоқда. Тест синовлари карантин қоидаларига қатъий риоя этилган ҳолда ўтказилади, ҳужжатлар 20 июндан 20 июлгача (20 июль куни ҳам) қабул қилинади.
2020 йил 7 июль соат 18:00 ҳолатига кўра, 2020/2021-ўқув йили учун рўйхатдан ўтган абитуриентлар сони 517 409 нафарга етган.
Аввалроқ абитуриентларни онлайн рўйхатдан ўтказиш тартиби ҳақида видеоқўлланма, абитуриентларга тест имтиҳонлари ўтказиладиган манзиллар жойлашувини кўрсатадиган илова ишлаб чиқилгани, тест синовлари бир кунда икки ёки уч сменада ўтказилиши ҳақида хабарлар берилган.
Шунингдек, Ўзбекистонда ОТМларга кириш имтиҳонларини 25 июлдан 20 августгача ўтказиш режалаштирилаётгани маълум қилинганди. Бироқ Ўзбекистонда коронавирус билан боғлиқ вазиятнинг кескинлашаётгани сабабли 10 июлдан 1 августгача мамлакатда қатъий карантин чоралари жорий қилинади. 10 июлдан автотранспорт ҳаракати чекланади, ташкилий-ҳуқуқий ва мулкчилик шаклидан қатъи назар мактабгача таълим ташкилотлари, ўқув курслари ва ҳар қандай тўгараклар ёпилади. Ўзбекистоннинг барча ҳудудлари эпидемиологик тоифаси «қизил» бўлади.
Изоҳ (0)