Футбол бўйича Англия Премьер Лигасининг 34-турида «Арсенал» 7 июль, сешанба куни ўз майдонида «Лестер» билан баҳс юритди.
Учрашувнинг 21-дақиқасида Пьер-Эмерик Обамеянг майдон эгаларини ҳисобда олдинга олиб чиқди. Иккинчи бўлимда меҳмонлар фаолликни оширди, бунинг устига 75-дақиқада лондонликлар бир ўйинчи кам бўлиб қолди: захирадан майдонга қўшилганига кўп бўлмаган Эдвард Нкетиа рақиб футболчисига нисбатан ўта қўпол ҳаракат қилди ва тўғридан-тўғри қизил карточка олди.
Шундан кейин устунлик тўлиқ «тулкилар» томонига ўтди. Қатор ҳужумлар 84-дақиқада ўз самарасини берди, Жейми Варди қанотдан узатилган тўпни дарвозага тўғирлаб юборди.
Шу тариқа «Лестер» ушбу дурангдан сўнг 59 очко билан 4-ўринга тушиб кетди. Ушбу турда ғалаба қозонган «Челси» 60 очко билан 3-поғонага кўтарилди. «Арсенал» (50) эса 7-ўринда қолди.
АПЛ
34-тур баҳси
7 июль, сешанба
«Арсенал» — «Лестер» 1:1
Голлар: 1:0 – 21 Обамеянг, 1:1 – 84 Варди.«Арсенал»: Мартинес, Бельерин, Мустафи, Давид Луиз, Тирни, Себальос (Торрейра, 80), Жака, Колашинац, Ляказетт (Нкетиа, 71), Обамеянг (Мэйтленд-Найлз, 90), Сака (Уиллок, 71).
«Лестер»: Шмейҳел, Беннетт (Грэй, 76), Эванс, Сўюнжу, Жастин, Ндиди (Прат, 82), Тилеманс, Олбрайтон (Фукс, 59), Перес, Варди, Иҳеаначо (Барнс, 59).
Огоҳлантириш: Мустафи (88).
Четлатиш: Нкетиа (75).
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!