АҚШ давлат котиби Майкл Помпео Fox News телеканалига берган интервьюсида Вашингтон мамлакат ҳудудида TikTok сервисини блоклаш имкониятини жиддий кўриб чиқаётганини маълум қилди.
Помпео бошловчининг «АҚШ ҳам Ҳиндистон ва Австралия каби Хитой иловасини блоклайдими?», деган саволига жавоб берар экан, бу содир бўлиши мумкинлигини таъкидлаб ўтган. Давлат котиби ушбу масалага батафсил тўхталиб ўтмаган, бироқ фуқароларга «шахсий маълумотлари Хитой коммунистларининг қўлига тушиб қолмаслиги учун TikTok’дан фойдаланишда эҳтиёткор бўлишни» маслаҳат берган.
АҚШ давлат котиби 2019 йилда АҚШ ZTE ва Huawei компаниялари Америка фуқароларининг шахсий маълумотларини Хитой ҳукуматига тақдим этишда гумонлаб, уларнинг миллий хавфсизликка таҳдид солишини эълон қилганини эслаб ўтган.
Аввалроқ Reuters агентлиги TikTok Гонконгда ўз фаолиятини тўхтатишга қарор қилгани тўғрисида хабар берганди. Бунга Хитой парламенти томонидан миллий хавфсизлик тўғрисидаги қонуннинг кучга кириши сабаб бўлган. Июнь охирларида Хитой «социализм қадриятларидан чекингани учун» TikTok’ка эгалик қилувчи компанияни жазолаган эди.
TikTok қисқа мусиқий видео яратишга, жонли эфирларни амалга оширишга ва хабар алмашишга имкон берувчи ижтимоий тармоқ сервиси ҳисобланади. 2016 йилнинг сентябрь ойида ишга туширилган дастур Хитойда қисқа видеолар бўйича етакчи ижтимоий тармоқ ҳисобланади.