Ўзбекистоннинг Москва шаҳридаги элчихонаси йўловчи ташиш билан шуғулланадиган айрим шахслар Россия—Қозоғистон чегарасига одамларни етказиб қўйиш ва чегарани кесиб ўтишда «ёрдам бериш»ни ваъда қилиб, турли эълонлар тарқатаётгани юзасидан баёнот берди. Элчихона фуқаролардан бу каби ёлғон хабарларга ишонмасликларини сўраган.
Фото: «Халқ сўзи Online»
Россия, Ўзбекистон ва Қозоғистонда жорий қилинган карантин чоралари, шу жумладан, мамлакатларга кириш бўйича чекловлар ўз кучида қолмоқда.
Афсуски, шу кунларда Самара вилоятидаги Большая Черниговка қишлоғи, Оренбург вилоятидаги Бузулук тумани ва Соль-Илецк шаҳрида Ўзбекистон фуқароларининг яна тўпланиши кузатилмоқда. Уларнинг кўпчилиги ёлғон хабарларга ишониб Россиянинг турли ҳудудларидан келган ва Қозоғистон орқали ватанимизга қайтиш истагини билдирмоқда.
Коронавирус инфекцияси пандемияси тарқалаётган бир пайтда фуқароларнинг бир жойда тўпланиши уларнинг вирус билан касалланиш эҳтимолини кескин оширади. Бундай ҳолат айниқса қариялар, касаллар, доимий касаллиги бор фуқаролар учун ниҳоятда хавфлидир.
Яна бир бор, Россия ҳудудидаги ватандошларимиздан турли ёлғон хабарлар ва миш-мишларга ишонмасликларини, Россия—Қозоғистон давлатлараро чегара пунктларига боришга уринмаслик, ҳозирги яшаш жойларида қолиб, карантин чораларига қатъий риоя қилишларини сўраб қоламиз.
Ўзбекистоннинг Россиядаги элчихонаси
Ўзбекистон Жиноят кодексига мувофиқ, карантинли ва инсон учун хавфли бўлган бошқа юқумли касалликлар тарқалиши ҳақида ҳақиқатга зид маълумотларни тарқатиш учун жавобгарлик белгиланган. Хусусан, мазкур маълумотларни нашр қилиш ёки бошқача усулда кўпайтирилган матнда ёки ОАВ, шунингдек, интернет орқали тарқатиш БҲМнинг 200 бараваридан 400 бараваригача (44,6 миллион сўмдан 89,2 миллион сўмгача) миқдорда жарима ёки 300 соатдан 360 соатгача мажбурий жамоат ишлари, 2 йилдан 3 йилгача ахлоқ тузатиш ишлари ёки 3 йилгача озодликни чеклаш ёхуд озодликдан маҳрум қилиш билан жазоланади.
Бундан ташқари, Россия қонунчилигига биноан, оғир оқибатларга олиб келишини била туриб ёлғон маълумотни тарқатиш 300 мингдан 2 миллион рублгача жарима ҳамда уч йилдан беш йилгача озодликдан маҳрум этиш билан жазоланади.
Аввалроқ Ўзбекистон Ташқи ишлар вазирлиги Россий—Қозоғистон чегарасидаги «Маштаково» ва «Сагарчин» назорат пунктлари яқинида яна Ўзбекистон фуқароларининг тўпланиши кузатилаётгани ҳақида хабар берилган эди.
Эслатиб ўтамиз, май ойида ҳам шу каби ҳолат рўй берган эди. 13 майда Россия—Қозоғистон чегарасида тўпланган ўзбекистонликлар Шавкат Мирзиёевга мурожаат йўллаган, эртаси куни эса Ўзбекистон ТИВ чегарада тўпланган юзлаб ўзбекистонликлардан Республика махсус комиссияси қарорини кутишни сўраган. Натижада Ўзбекистон ҳукумати Россия ва Қозоғистон ваколатли органлари билан келишган ҳолда, 1200 нафар фуқарони автобусда мамлакат ҳудудига олиб келишга эришганди.
