Андижон вилояти Асака туманида содир бўлган пичоқбозлик бўйича жиноят иши қўзғатилди, дея хабар беради Ички ишлар вазирлиги ҳузуридаги Тергов департаменти.

Қайд этилишича, 2020 йилнинг 22 июнь куни соат 10:00 да 25 ёшли С.Н. Асака тумани «Беруний» МФЙ ҳудудида жойлашган «Султон Сарой» кафеси олдида таниши 25 ёшли Д.О.га таниш қизга нима учун қўнғироқ қилганлигини сўраб, у билан ўзаро жанжаллашиб кетган.

Жанжал вақтида С.Н. ёнида бўлган хўжалик пичоғи билан Д.О.нинг ўнг орқа кўкрак соҳасига бир маротаба уриб тан жароҳати етказган.

Мазкур ҳолат Асака тумани ИИБнинг жиноят ҳақидаги ҳодиса ва хабарлар рўйхатидан ўтказилиб, ҳодиса жойига туман ИИБ тергов-тезкор гуруҳи аъзолари чиққан, ҳодиса жойи кўздан кечирилган.

Олиб борилган терговга қадар текширув давомида С.Н.дан бир дона хўжалик пичоғи ҳамда Д.О.дан ҳодиса вақтида эгнида бўлган устки кийимлари холислар иштирокида баённома орқали олинган.

Судга оид экспертиза хулосасига кўра, Д.О. ўртача оғир турдаги тан жароҳати олганлиги аниқланган.

Ҳолат юзасидан Асака тумани ИИБ ҳузуридаги Тергов бўлими томонидан Ўзбекистон Республикаси Жиноят кодексининг 277-моддаси 2-қисми «а, в» бандлари (баданга ўртача оғир шикаст етказиб, совуқ қурол ёки кишининг соғлиғи учун амалда шикаст етказиши мумкин бўлган нарсаларни қурол сифатида қўллаш билан содир этилган безорилик) билан жиноят иши қўзғатилган.

С.Н. гумон қилинувчи тариқасида жалб қилинган. Ҳозирда дастлабки Тергов ҳаракатлари олиб борилмоқда.

Аввалроқ Тошкентдаги «Арча-кўча»да юз берган пичоқбозлик иштирокчиси жанжал тафсилотларини айтиб берган эди.