2020—2021 йиллар Тошкент шаҳрини куз-қиш мавсумига тайёрлаш дастури доирасида 3 июлдан Юнусобод тумани Аҳмад Дониш кўчасининг Анорзор кўчасига бурилиш учун мўлжалланган қўшимча кўчадан ўтувчи магистрал иссиқлик тармоғини капитал таъмирлаш ишлари бошланмоқда. Бу ҳақда пойтахт шаҳар ҳокимлиги матбуот хизмати хабар берди.
Маълумотларга кўра, мазкур магистрал иссиқлик тармоғининг капитал таъмирланаётган қисмида охирги 3 йил давомида 17 та авария ҳолати қайд этилган. Таъмирлаш ишлари 14 кун давомида, аҳолига иссиқ сув таъминоти узилмаган тартибда амалга оширилади.
Иш жараёнида Аҳмад Дониш кўчасининг Анорзор кўчасига бурилиш учун мўлжалланган қўшимча кўча тўлиқ ёпилади ва ушбу йўналишдаги автотранспорт қатнови асосий йўлдан амалга оширилади.
«Шу муносабат билан ҳайдовчиларга юзага келиши мумкин бўлган тирбандликларнинг олдини олиш мақсадида айланма йўллардан фойдаланишлари тавсия этилади», — дейилади хабарда.
Аввалроқ Тошкентнинг Абдулла Қодирий ва Лабзак кўчалари кесишмасидаги кўприкда олиб борилаётган таъмирлаш ишлари қачонгача давом этиши тўғрисида маълумот берилганди.
Изоҳ (0)