Қашқадарёда 33 ёшли аёлнинг сурат ва видеоларини интернетга тарқатиш билан қўрқитиб, пул талаб қилган шахс қўлга олинди. Бу ҳақда ИИВ ҳузуридаги Тергов департаменти хабар берди.
Қайд этилишича, 33 ёшли Х.Н. Қашқадарё вилояти ИИБ га ариза билан мурожаат қилиб сурат ва видеоларини интернетга тарқатиш билан қўрқитиб, 1000 доллар талаб қилган таниши С. исмли шахсга нисбатан қонуний чора кўришни сўраган.
Унинг билдиришича, С. исмли шахс билан 2020 йилнинг февраль ойида Telegram’да танишиб қолган, у билан ижтимоий тармоқ орқали ўзаро ёзишиб, гаплашиб турган, унга ўзининг бир нечта фотосурат ва видеоларни юборган.
Аёл Россиянинг Уфа шаҳрида ишлаб келаётгани сабабли С. исмли шахсни жиноят устида қўлга олишда 21 ёшли таниши У.О. ёрдам беришини айтган.
Мазкур ариза юзасидан 28 июнь куни соат 14:40 да ИИБ ходимлари томонидан Қарши шаҳар И.Каримов кўчасида жойлашган «Шарқ зиёкори» савдо биноси яқинида ўтказилган тезкор-тадбир давомида, Қамаши туманида яшовчи 24 ёшли С.А. тадбирда иштирок этаётган фуқаро У.О., дан кимёвий ишлов берилган 900 доллар миқдордаги пул маблағини олиб, эвазига фуқаро фотосурат ва видеоларини ўчириб юбориш учун ўзига тегишли Samsung Ж8 русумли уяли алоқа воситасини У.О.га тақдим қилган вақтда ашёвий далиллар билан ушланган.
Ҳолат юзасидан Қарши шаҳар ИИБ ҳузуридаги Тергов бўлими томонидан С.А.га нисбатан Жиноят кодексининг 165-моддаси 1-қисми (товламачилик) билан жиноят иши қўзғатилган. Ҳозирда жиноят иши юзасидан дастлабки тергов ҳаракатлари олиб борилмоқда.
