Ички ишлар органларига ҳимоя ордери сўраб мурожаат қилган барча аёлларнинг аризаси қаноатлантирилган. Бу ҳақда Ички ишлар вазирлиги ҳуқуқбузарликлар профилактикаси бош бошқармаси матбуот котиби Индира Канлибаева «Дарё»га маълум қилди.
Бошқарма берган маълумотларга кўра, 2020 йилнинг беш ойи давомида тазйиқ ва зўравонликка учраган 1451 нафар аёл ҳимоя ордери сўраб ички ишлар органларига мурожаат қилган. Уларнинг барчасига ҳимоя ордери расмийлаштириб берилган. Шундан 829 нафар аёл жисмоний, 437 нафар аёл руҳий, 9 нафар аёл жинсий, 18 нафар аёл эса иқтисодий зўравонлик қурбони бўлган. Шунингдек, 158 нафар аёл тазйиққа учраган.
Энг кўп мурожаат Тошкентда бўлиб, 473 нафар аёл ариза билан шикоят қилган. Тошкент вилоятидан 183 нафар, Фарғона вилоятидан эса 108 нафар аёл кўмак сўраган. Энг кам мурожаат Жиззах вилоятидан бўлиб, 43 нафар аёлдан ҳимоя ордери бериш бўйича аризалар келиб тушган.
Маълумот учун, Вазирлар Маҳкамасининг «Тазйиқ ва зўравонликдан жабрланган хотин-қизларга ҳимоя ордерини бериш, ижросини таъминлаш ва мониторинг олиб бориш тўғрисида»ги низомига муфовиқ ҳимоя ордери бериш учун тазйиқ ва зўравонлик қурбонининг мурожаати, жисмоний ёки юридик шахсларнинг хабарлари, шу жумладан, оммавий ахборот воситалари ва (ёки) ижтимоий тармоқлар орқали тарқалган хабарлар, тазйиқ ёки зўравонлик содир этиш ёхуд уларни содир этишга уриниш ҳолатларининг ваколатли органлар ва ташкилотлар ходимлари томонидан бевосита аниқланиши, давлат органларидан ва бошқа ташкилотлардан олинган материаллар асос ҳисобланади.
Қуйидагилар ҳимоя ордерини бериш учун асос ҳисобланади:
- тазйиқ ва зўравонлик қурбонининг мурожаати;
- жисмоний ёки юридик шахсларнинг хабарлари, шу жумладан, оммавий ахборот воситалари ва (ёки) ижтимоий тармоқлар орқали тарқалган хабарлар;
- тазйиқ ёки зўравонлик содир этиш ёхуд уларни содир этишга уриниш ҳолатларининг ваколатли органлар ва ташкилотлар ходимлари томонидан бевосита аниқланиши;
- давлат органларидан ва бошқа ташкилотлардан олинган материаллар.
Изоҳ (0)