Ўзбекистонда 25 июнь куни 276 кишида коронавирус аниқланиб, рекорд кўрсаткич қайд этилди. Мазкур беморларнинг 24 нафар аҳоли орасида аниқланган. Шундан Тошкент шаҳрида 17 нафар, Тошкент вилоятида 4 нафар, Жиззах вилоятида 2 нафар ҳамда Андижон вилоятида 1 нафар бемор аҳоли орасида қайд этилган, деб хабар бермоқда Соғлиқни сақлаш вазирлиги.

Фото: «Дарё»

Жумдалан, Тошкент вилояти Ўрта Чирчиқ туманида яшовчи З.Х.да касаллик қайд этилган. Қибрай туманида яшовчи 2 нафар фуқаро тана ҳарорати кўтарилганлиги сабабли намуна топширган ва уларда коронавирус тасдиқланган. Бундан ташқари, Паркент туманида яшовчи Ш.А.да ҳам касаллик аниқланган.

Шунингдек, Жиззах вилояти Шароф Рашидов ва Жиззах туманларида яшовчи 2 нафар фуқаро Шароф Рашидов туманида туғилган кун нишонлашга борган. Шундан сўнг, уларнинг тана ҳарорати кўтарилганлиги сабабли намуна топширган ва уларда коронавирус аниқланган.

Андижон вилояти Балиқчи туманида яшовчи С.А.да ҳам касаллик қайд этилган. Маълум бўлишича, мазкур фуқаро Россия ҳарбий космонавтлар академияси талабаси ҳисобланади. У жорий йилнинг 12 май куни Санкт-Петербург шаҳридан чартер рейс билан келган ва 27 майда карантин муассасасидан чиққан.

«Юқорида қайд этилган ҳолатлардан келиб чиққан ҳолда, Соғлиқни сақлаш вазирлиги аҳолидан имкон қадар фаол мулоқотдан, турли тадбирлар ўтказишдан вақтинчалик тийилишларини ва, албатта, қўл бериб саломлашмаслик, қучоқ очиб кўришмаслик, озодаликка риоя қилиш, сабабсиз кўчага чиқмаслик, ижтимоий масофани сақлаш, ниқобни тўғри тақиб юриш каби карантин қоидаларига қатъий риоя этиб, бизга, шифокорларга ёрдам беришингизни сўраб қолади», — дейилади вазирлик хабарида.

Ўзбекистонда 26 июнь соат 10:00 ҳолатига кўра, коронавирус инфекцияси қайд этилганлар сони 51 кишига кўпайиб, 7228 нафарни ташкил этмоқда. Айни пайтда мамлакатда коронавирус инфекциясига чалинган 4877 нафар фуқаро (68 фоиз) соғайган. Эпидемия бошланганидан бери 20 нафар бемор коронавирус асоратлари оқибатида вафот этган.