O‘zbekistonda 25-iyun kuni 276 kishida koronavirus aniqlanib, rekord ko‘rsatkich qayd etildi. Mazkur bemorlarning 24 nafar aholi orasida aniqlangan. Shundan Toshkent shahrida 17 nafar, Toshkent viloyatida 4 nafar, Jizzax viloyatida 2 nafar hamda Andijon viloyatida 1 nafar bemor aholi orasida qayd etilgan, deb xabar bermoqda Sog‘liqni saqlash vazirligi.
Jumdalan, Toshkent viloyati O‘rta Chirchiq tumanida yashovchi Z.X.da kasallik qayd etilgan. Qibray tumanida yashovchi 2 nafar fuqaro tana harorati ko‘tarilganligi sababli namuna topshirgan va ularda koronavirus tasdiqlangan. Bundan tashqari, Parkent tumanida yashovchi Sh.A.da ham kasallik aniqlangan.
Shuningdek, Jizzax viloyati Sharof Rashidov va Jizzax tumanlarida yashovchi 2 nafar fuqaro Sharof Rashidov tumanida tug‘ilgan kun nishonlashga borgan. Shundan so‘ng, ularning tana harorati ko‘tarilganligi sababli namuna topshirgan va ularda koronavirus aniqlangan.
Andijon viloyati Baliqchi tumanida yashovchi S.A.da ham kasallik qayd etilgan. Ma’lum bo‘lishicha, mazkur fuqaro Rossiya harbiy kosmonavtlar akademiyasi talabasi hisoblanadi. U joriy yilning 12-may kuni Sankt-Peterburg shahridan charter reys bilan kelgan va 27-mayda karantin muassasasidan chiqqan.
“Yuqorida qayd etilgan holatlardan kelib chiqqan holda, Sog‘liqni saqlash vazirligi aholidan imkon qadar faol muloqotdan, turli tadbirlar o‘tkazishdan vaqtinchalik tiyilishlarini va, albatta, qo‘l berib salomlashmaslik, quchoq ochib ko‘rishmaslik, ozodalikka rioya qilish, sababsiz ko‘chaga chiqmaslik, ijtimoiy masofani saqlash, niqobni to‘g‘ri taqib yurish kabi karantin qoidalariga qat’iy rioya etib, bizga, shifokorlarga yordam berishingizni so‘rab qoladi”, — deyiladi vazirlik xabarida.
Mavzuga doir:Toshkentda 25-iyun kuni Sergeli tumani hokimligi va “O‘zbekneftegaz” xodimlarida koronavirus aniqlandi
Izoh (0)