Саудия Арабистони хорижлик зиёратчилар учун 2020 йилги Ҳаж зиёратини бекор қилди
Коронавирус пандемияси сабабли Саудия Арабистони хорижлик зиёратчилар учун 2020 йилги Ҳаж зиёратини бекор қилди. Бу ҳақда Вазирлар Маҳкамаси ҳузуридаги Дин ишлари бўйича қўмита матбуот хизмати хабар берди.
«Саудия Арабистони Ҳаж ва Умра ишлари вазирлиги 2020 йилги Ҳаж мавсумини фақат Саудия Арабистони ичида бўлиб турган фуқаролардан иборат зиёратчилар учун чекланган миқдорда ташкил этиши ҳақида қарор қабул қилди. Хорижий мамлакатлардан зиёратчилар қабул қилинмайди», — дейилади хабарда.
Бу йилги мавсум 28 июль–2 август оралиғига тўғри келиши тахмин қилинган.
Аввалроқ коронавирус сабабли Малайзия ва Индонезия ўз фуқароларига 2020 йилда Ҳаж зиёратини бекор қилгани тўғрисида хабар берилганди.
Эслатиб ўтамиз, Саудия Арабистонида комендантлик соати 21 июндан бекор қилинган, бироқ шунга қарамай, кўплаб чекловлар ўз кучида қолган.
Жонс Ҳопкинс университети маълумотларига кўра, Саудия Арабистонида коронавирус билан касалланганлар сони 161 минг кишидан ошган, ҳозирга қадар 1,3 мингдан ортиқ одам COVID-19 қурбонига айланган.
