«Манчестер Сити» ҳужумчиси Серхио Агуэро Премьер Лига 30-тури доирасида кечган «Бёрнли»га қарши баҳсда (5:0) тиззасидан жароҳат олди. Бу ҳақда унинг отаси Лионель дел Кастильо маълум қилди.
«Яқинда Серхио билан гаплашгандим. У ҳафта давомида тиззасида муаммо сезди. Бу мениск (сон ва болдир суяклари орасидаги тоғай). Сешанба куни у тиббий кўрикдан ўтади ва жароҳатнинг жиддийлик даражаси маълум бўлади.
Агуэро ўтган сафаргидек Барселонада операция қилинади», — дейди футболчининг отаси.
Учрашувнинг 45-дақиқасида «Бёрнли» ҳимоячиси Бен Ми аргентиналик футболчига нисбатан қўпол ҳаракат қилди ва бунинг натижасида меҳмонлар дарвозаси томон пенальти белгиланди. Агуэро эса ушбу тўқнашувдан кейин ўйинни давом эттира олмади.
Серхио Премьер Лига жорий мавсумида 24 та ўйин ўтказиб, 16 та гол урди ва тўртта голли узатма амалга оширди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)