Қашқадарё ҳокими Зоир Мирзаев ҳафтанинг ҳар жумасини Ёшларни иш билан таъминлаш ва муаммоларини ечиш куни деб эълон қилди. Бу ҳақда вилоят ҳокимининг битирувчиларга қилган мурожаатномасида маълум қилинди, дея хабар берди «Дарё» мухбири Отабек Қўлдошев.
Таъкидланишича, 23 июнь, сешанба куни Қашқадарё ҳокими Зоир Мирзаев вилоятдаги битирувчи ёшларга мурожаатнома йўллаган.
«2019/2020-ўқув йилида вилоятдаги мавжуд умумтаълим мактабларини 47 680 нафар ўқувчи тамомлади. Уларнинг 409 нафари олтин, 313 нафари эса кумуш медаль соҳиби бўлди. Ўтказилган сўров ва ўрганиш натижасига кўра, мактаб битирувчиларининг 38 470 нафари ОТМларда, 9210 нафари ўрта махсус таълим муассасаларида ўқишни давом эттириш истагини билдирган», — деди вилоят ҳокими Зоир Мирзаев.
Мурожаатномада айтилишича, вилоятда 18-30 ёшдагилар 391 785 нафарга етган. Уларнинг 26 481 нафари ишсиз эканлиги маълум бўлгач, йил бошидан айни кунга қадар 13 536 нафари иш билан банд қилинган.
«Энди ҳафтанинг ҳар жума куни хоҳ у бошқарма бошлиғи бўлсин, хоҳ ҳоким ёшларни тинглайди ва уларни иш билан банд қилиш, муаммосини ечишга вақт ажратади», — деди Зоир Мирзаев.
Вилоят ҳокимининг маълумот беришича, вилоятдаги кам таъминланган ва эҳтиёжманд оилаларнинг олий таълим муассасаларида таълим олаётган 48 нафар ташаббускор ва иқтидорли фарзандининг 162 миллион сўмлик шартнома-тўловлари тўлаб берилган.
Мавзуга доир:
Изоҳ (0)