Ўзбекистон давлат консерваториясига ўқишга киритиб қўйиш эвазига 5 минг доллар олган лицей ўқитувчиси қўлга тушди. Бу ҳақда «Ахборот 24» дастурида маълум қилинди.

Хабар берилишича, ДХХ ва прокуратура ходимлари ҳамкорлигида ўтказилган тезкор тадбирда Тошкентдаги Ўзбекистон давлат консерваторияси қошидаги Иқтидорли болалар академик лицейи катта ўқитувчиси ўзганинг ишончига кириб, ундан 5 минг долларни олган вақтида ашёвий далиллар билан ушланган.

Ўқитувчи мазкур пул эвазига муқаддам ушбу лицейда ўқиган фуқарони юқори лавозимда ишловчи танишлари орқали Ўзбекистон давлат консерваториясига ўқишга киритиб қўйишни ваъда қилган.

Аввалроқ Тошкент вилоятида 60 минг долларга ер сотмоқчи бўлган туман ҳокими ўринбосари қўлга олингани, Тошкент вилоятида ҳарбий қисм майори 3 минг доллар пора билан ушлангани ҳақида хабарлар берилганди.