Калифорнияда беш дона ноёб Cadillac 155 минг доллар эвазига сотувга қўйилди. Коллекциядан 1954—1960 йилларда ишлаб чиқарилган моделлар, шунингдек, 1976 йилги афсонавий Eldorado модели ўрин олган. Машиналарни алоҳида харид қилиш мумкин эмас, деб хабар беради Motor.
Коллекциядан оқ ва қора рангли кабриолет, кўк ва олти ойнали кумушранг 62-серия седанлари, шунингдек, қизил Eldorado кабриолети ўрин олган. Машиналар эгасининг сўзларига кўра, барча автомобиллар 70 мингдан 180 минг километрга қадар йўл босган. Ташқи кўриниши яхши сақланганига қарамай, аксарият моделлар таъмирталаб.
Масалан, оқ кабриолетнинг ёқилғи насосини янгилаш, олти ойнали седаннинг эса тормоз тизимини тўлиқ таъмирлаш керак. Барча кабриолетларнинг том қисмини ҳам алмаштириш керак. Сотувга қўйилган нусхалар орасида энг яхши сақланиб қолгани — Eldorado.
Иккита кабриолет ва 62-серияга тегишли седан 325 от кучига эга 6,4 литрли V8 двигатели билан жиҳозланган.
1954 йилда ишлаб чиқарилган кўк седанга 230 от кучига эга 6,0 литрли мотор ўрнатилган. Тўқ қизил рангдаги Eldorado’ни эса 210 от кучига эга 8,2 литрли V8 ҳаракатга келтиради. Машиналарга ўрнатилган барча агрегатлар автоматик узатмалар қутиси ёрдамида бошқарилади.
Аввалроқ АҚШда чўлда ташландиқ ётган 29 классик автомобилдан иборат коллекция сотувга қўйилгани тўғрисида хабар берилганди.
Изоҳ (0)