«Яшил» ҳудуд мақомини олган Андижон вилоятида 15 июндан бошлаб болалар оромгоҳлари ўз фаолиятини бошлади, дея хабар берди «Дарё» мухбири Умиджон Мамарасулов.

Фото: «Дарё»

Андижон вилоят касаба уюшмалари ташкилотлари бирлашмаси маданий-маърифий ва спорт ишлари бўлими мудири Нодира Абдураҳмонованинг айтишича, жорий йилги ёз мавсуми давомида жами 6 та — Андижон туманидаги «Боғишамол», Балиқчи туманидаги «Шаббода шифо файз», Булоқбоши туманидаги «Энергетика» ва «Шифокор», Бўстон туманидаги «Қуёшча», Пахтаобод туманидаги «Бўстон» оромгоҳлари болаларни қабул қилади.

Ушбу оромгоҳларда айни кунга қадар ободонлаштириш, бино ва иншоотларни технологик ускуналар, хусусан, сув таъминоти ва канализация тизимларини таъмирлаш билан бирга профилактик дезинфекция, дезинфекция ва дератизация ишлари олиб борилиб, ёзги мавсумга шай ҳолатга келтирилган. Шунингдек, озиқ-овқат таъминоти, хавфсизлик, шошилинч тиббий ёрдам масалаларига алоҳида эътибор қаратилиб, санитария-эпидемиологик осойишталик марказлари билан бирга оромгоҳларда карантин чоралари кўрилган.

Фото: «Дарё»

«Мавсум давомида жами уч навбатда 2130 нафар болани қабул қилишни режалаштирганмиз. Уларда кунда икки маҳал болаларнинг ҳарорати ўлчаниши, ниқобларда бўлиши ва антисептик воситалардан фойдаланиши, энг асосийси, ижтимоий масофанинг сақланиши доимий назоратда бўлади. Бунинг учун ҳар бир оромгоҳга масъул ходимлар бириктирилган», — дейди Нодира Абдураҳмонова.

Фото: «Дарё»

Абдураҳмонованинг қўшимча қилишича, касаба уюшма тасарруфидаги «Боғишамол» оромгоҳи коронавирус пандемияси сабабли карантин объектлари рўйхатига киритилган бўлиб, шу кунга қадар тўрт маротаба 14 кундан карантинга 774 нафар фуқаролар жойлаштирилган. Шу сабабли оромгоҳ 30 июнь кунидан бошлаб ўқувчиларни ўз бағрига олади.