2020 йилнинг 16 июнь куни Сув хўжалиги вазирлигида «Ўзбекистонда сув ресурсларини бошқариш миллий лойиҳасининг 2-босқичи тўғрисида» икки томонлама битим имзоланди. Бу ҳақда Сув хўжалиги вазирлиги матбуот хизмати хабар қилган.
Ҳужжат Ўзбекистон Республикаси ҳукумати номидан Сув хўжалиги вазири Шавкат Хамраев ва Швейцария конфедерацияси ҳукумати номидан Швейцариянинг Ўзбекистондаги фавқулодда ва мухтор элчиси Оливе Шав томонидан имзоланган.
Хабарда қайд этилишича, «Ўзбекистонда сув ресурсларини бошқариш миллий лойиҳаси»нинг 1-босқичи муваффақиятли якунланган ва 2-босқич Швейцария ҳамкорлик ва тараққиёт агентлигининг «Марказий Осиёда сув ресурсларини бошқариш ҳудудий дастури» доирасидаги фаолиятининг мантиқий давоми бўлади. Унда Ўзбекистондаги сув ресурсларини интеграллашган ҳолда бошқариш орқали қишлоқ аҳолисининг яшаш шароитларини яхшилашга ҳисса қўшиш назарда тутилган.
Лойиҳанинг умумий бюджети 4,6 миллион Швейцария франкига тенг ва у 2020–2023 йилларда амалга оширилади.
Дастурга мувофиқ, Ўзбекистондаги 13 та ирригация тизимлари ҳавза бошқармаси ва 152 та туман ирригация бўлимларида сувдан самарали фойдаланиш ва сув ресурсларини барқарор бошқаришни режалаштириш учун дастурий таъминот мажмуи ишлаб чиқилади, шунингдек, суғориш-дренаж тармоқларини АКТ асосида мониторинг қилиш тизимини яратиш ҳам кўзда тутилган.
Келгусида қишлоқ хўжалиги ва сув ресурсларини бошқаришга ихтисослашган касб-ҳунар коллежлари ўқувчилари ҳамда фермерларнинг сув тежовчи технологиялар ҳақидаги билимларини мустаҳкамлашга қаратилган тадбирлар амалга оширилади, дейилган вазирлик матбуот хизмати берган хабарда.
Ўзбекистон ва Швейцария сув хўжалигини ривожлантириш борасидаги ҳамкорлик бўйича келишув 2016 йил 18 августда имзоланган. Швейцария конфедерацияси томонидан молиялаштирилаётган ва Ўзбекистон ҳукумати билан ҳамкорликда ишлаб чиқилган лойиҳанинг умумий қиймати 2,7 миллион АҚШ долларини ташкил қилиб, у Республика Қишлоқ ва сув хўжалиги вазирлиги билан ҳамкорликда 2016—2018 йиллар давомида амалга оширилиши белгиланган эди.
Изоҳ (0)