Ўзбекистон вилоятларидаги барча ҳудудий аэропортларида 2020 йилнинг 1 августидан «Очиқ осмон» режими жорий этилади. Бу ҳақдаги буйруқ Ўзбекистон транспорт вазири томонидан 2020 йил 12 июнь куни имзоланди, деб хабар бермоқда Транспорт вазирлиги.
Мазкур буйруқ Ўзбекистон Президентининг 2019 йил 1 февралдаги «Транспорт соҳасида давлат бошқаруви тизимини тубдан такомиллаштириш чора-тадбирлари тўғрисида»ги ва 2019 йил 13 августдаги «Ўзбекистон Республикасида туризм соҳасини янада ривожлантириш чора-тадбирлари тўғрисида»ги фармонларига мувофиқ, республика фуқаро авиацияси ва туризм соҳаларида олиб борилаётган ислоҳотлар самарадорлигини ошириш мақсадида ишлаб чиқилди.
Маълум қилинишича, «Очиқ осмон» режими 2020 йилнинг 1 августидан бошлаб Халқаро ҳаво транспорти уюшмаси IATA’нинг «Қиш 2022/2023» мавсуми якунигача икки йил муддатга уни узайтириш ёки шартларни ўзгартириш имконияти билан жорий этилади. Мазкур режим Ўзбекистоннинг Қарши, Нукус, Термиз, Бухоро, Навоий, Урганч, Андижон, Фарғона, Наманган ва Самарқанд шаҳридаги аэропортларда «бешинчи ҳаво эркинлиги» ҳуқуқини қўллаган ҳолда жорий қилинади.
Буйруққа мувофиқ «Очиқ осмон» режими:
- Қарши, Нукус, Термиз, Бухоро, Навоий ва Урганч шаҳридаги аэропортларда ҳеч қандай чекловларсиз;
- Андижон, Фарғона, Наманган ва Самарқанд шаҳридаги аэропортларда Халқаро фуқаро авиацияси ташкилотига аъзо давлатларнинг авиакомпанияларига мазкур аэропортларга уларнинг техник имкониятларини инобатга олган ҳолда парвозлар сони чекловларисиз, Ўзбекистон Республикаси тайинланган ташувчилари фойдаланмаган йўналишларда «бешинчи ҳаво эркинлиги»ни қўллаган ҳолда йўловчи парвозларини амалга ошириш ҳуқуқи билан;
- Самарқанд шаҳридаги аэропортда қайта таъмирлаш ишлари якунлангач жорий этилади.
Янги йўналишларда парвозларни ташкиллаштириш ва амалга оширишга қизиқиш билдирган ёки амалдаги парвозлар сонини оширишни режалаштирган хорижий авиакомпаниялар ўрнатилган тартибда талаб этилган ҳужжатларни Транспорт вазирлиги ҳузуридаги «Ўзавиация» агентлигига ёки Транспорт вазирлигининг Ҳаво транспортини ривожлантириш департаментига топшириши лозим.
Эслатиб ўтамиз, Ўзбекистон Президентининг 2019 йил 13 августдаги «Ўзбекистон Республикасида туризм соҳасини янада ривожлантириш чора-тадбирлари тўғрисида»ги фармони билан 2019 йилнинг 1 октябридан Қарши, Нукус ва Термиз халқаро аэропортларида «бешинчи ҳаво эркинлиги» даражасини қўллаган ҳолда «Очиқ осмон» режими жорий қилиниши, «Бухоро» халқаро аэропорти хориж фуқароларини ташиш учун худди шундай эркинликни қўлга киритиши белгиланганди.
Маълумот учун, Ўзбекистон коронавирус пандемияси сабабли тўхтаб қолган халқаро авиқатновларини 15 июндан бошлаб «қизил», «сариқ» ва «яшил» рейслар принципи асосида қайта тиклади.
Изоҳ (0)