O‘zbekiston viloyatlaridagi barcha hududiy aeroportlarida 2020-yilning 1-avgustidan “Ochiq osmon” rejimi joriy etiladi. Bu haqdagi buyruq O‘zbekiston transport vaziri tomonidan 2020-yil 12-iyun kuni imzolandi, deb xabar bermoqda Transport vazirligi.
Mazkur buyruq O‘zbekiston Prezidentining 2019-yil 1-fevraldagi “Transport sohasida davlat boshqaruvi tizimini tubdan takomillashtirish chora-tadbirlari to‘g‘risida”gi va 2019-yil 13-avgustdagi “O‘zbekiston Respublikasida turizm sohasini yanada rivojlantirish chora-tadbirlari to‘g‘risida”gi farmonlariga muvofiq, respublika fuqaro aviatsiyasi va turizm sohalarida olib borilayotgan islohotlar samaradorligini oshirish maqsadida ishlab chiqildi.
Ma’lum qilinishicha, “Ochiq osmon” rejimi 2020-yilning 1-avgustidan boshlab Xalqaro havo transporti uyushmasi IATA’ning “Qish 2022/2023” mavsumi yakunigacha ikki yil muddatga uni uzaytirish yoki shartlarni o‘zgartirish imkoniyati bilan joriy etiladi. Mazkur rejim O‘zbekistonning Qarshi, Nukus, Termiz, Buxoro, Navoiy, Urganch, Andijon, Farg‘ona, Namangan va Samarqand shahridagi aeroportlarda “beshinchi havo erkinligi” huquqini qo‘llagan holda joriy qilinadi.
Buyruqqa muvofiq “Ochiq osmon” rejimi:
- Qarshi, Nukus, Termiz, Buxoro, Navoiy va Urganch shahridagi aeroportlarda hech qanday cheklovlarsiz;
- Andijon, Farg‘ona, Namangan va Samarqand shahridagi aeroportlarda Xalqaro fuqaro aviatsiyasi tashkilotiga a’zo davlatlarning aviakompaniyalariga mazkur aeroportlarga ularning texnik imkoniyatlarini inobatga olgan holda parvozlar soni cheklovlarisiz, O‘zbekiston Respublikasi tayinlangan tashuvchilari foydalanmagan yo‘nalishlarda “beshinchi havo erkinligi”ni qo‘llagan holda yo‘lovchi parvozlarini amalga oshirish huquqi bilan;
- Samarqand shahridagi aeroportda qayta ta’mirlash ishlari yakunlangach joriy etiladi.
Yangi yo‘nalishlarda parvozlarni tashkillashtirish va amalga oshirishga qiziqish bildirgan yoki amaldagi parvozlar sonini oshirishni rejalashtirgan xorijiy aviakompaniyalar o‘rnatilgan tartibda talab etilgan hujjatlarni Transport vazirligi huzuridagi “O‘zaviatsiya” agentligiga yoki Transport vazirligining Havo transportini rivojlantirish departamentiga topshirishi lozim.
Eslatib o‘tamiz, O‘zbekiston Prezidentining 2019-yil 13-avgustdagi “O‘zbekiston Respublikasida turizm sohasini yanada rivojlantirish chora-tadbirlari to‘g‘risida”gi farmoni bilan 2019-yilning 1-oktabridan Qarshi, Nukus va Termiz xalqaro aeroportlarida “beshinchi havo erkinligi” darajasini qo‘llagan holda “Ochiq osmon” rejimi joriy qilinishi, “Buxoro” xalqaro aeroporti xorij fuqarolarini tashish uchun xuddi shunday erkinlikni qo‘lga kiritishi belgilangandi.
Ma’lumot uchun, O‘zbekiston koronavirus pandemiyasi sababli to‘xtab qolgan xalqaro aviqatnovlarini 15-iyundan boshlab “qizil”, “sariq” va “yashil” reyslar prinsipi asosida qayta tikladi.
Izoh (0)