Санитария-эпидемиологик осойишталик агентлиги директорининг биринчи ўринбосари Ботир Қурбонов 17 июнь, чоршанба куни бўлиб ўтган брифингда мамлакатда хостеллар фаолиятини қачондан тиклаши ва бунинг учун қандай талабларга риоя қилиши кераклиги ҳақидаги саволга жавоб берди.
Ботир Қурбоновнинг сўзларига кўра, хостеллар фаолиятига меҳмонхоналар учун белгиланган вақтинчалик санитария қоида ва меъёрлари қўлланилади.
«COVID-19 пандемияси даврида чеклаш тадбирларининг қўлланилиши шароитида давлат органлари ва бошқа ташкилотлар, шунингдек, тадбиркорлик субъектларининг фаолиятини ташкил қилиш тўғрисидаги вақтинчалик санитария қоида ва меъёрларида меҳмонхоналар учун ишлаб чиқилган талаблар хостеллар учун ҳам амал қилади», — деди агентлик директорининг биринчи ўринбосари.
Бироқ Ботир Қурбонов хостелларнинг айнан қачон очилиши ҳақида аниқ маълумот бермади.
Эслатиб ўтамиз, Ўзбекистондаги «сариқ» ва «яшил» ҳудудларда меҳмонхоналар фаолиятига 8 майдан бошлаб рухсат берилган. 5 июндан эса мазкур ҳудудларда меҳмон уйларининг фаолиятига рухсат берилди. Ўзбекистонда ички туризм 1 июндан бошлаб қайта тикланди. Хостеллар эса ҳали ҳам барча ҳудудларда ёпиқлигича қолмоқда.
Изоҳ (0)