Ўзбекистонда 16 июнь куни коронавирус аниқланган 230 нафар бемордан 20 нафари аҳоли орасида тасдиқланди. Соғлиқни сақлаш вазирлиги мазкур беморлар ҳақида маълумот берди.

Фото: «Дарё»

Қайд этилишича, 15 июнь санасида мамлакатда коронавирус инфекцияси тасдиқланган 183 нафар беморнинг 29 нафари аҳоли орасида аниқланган бўлса, 16 июнь куни эса коронавирус қайд этилган 230 нафар бемордан 20 нафари аҳоли орасида тасдиқланди. Икки кунлик маълумотга кўра, умумий касалланиш кўрсаткичи анча ошган, аҳоли орасида коронавирусга чалиниш ҳолати эса бирмунча камайган.

16 июнь куни аҳоли орасида коронавирусга чалиниш ҳолатлари қуйидаги ҳудудларда қайд этилган:

  • Тошкент шаҳрида 14 нафар;
  • Бухоро вилоятида 3 нафар;
  • Самарқанд вилоятида 2 нафар;
  • Наманган вилоятида 1 нафар.

Маълум қилинишича, Тошкент шаҳри Олмазор туманида яшовчи оиланинг 3 нафар аъзосида коронавирус аниқланган. Улар дам олиш ҳудудига ҳордиқ чиқариш учун оилавий борган, бир кундан кейин тана ҳарорати кўтарилгач, улар таҳлил топширган ва касаллик аниқланган. Шу туманда яшовчи яна уч нафар фуқарода ҳам вирус тасдиқланган. Шунингдек, коронавирус Учтепа туманидаги тикувчилик цехи ишчисида, ишга жойлашиш учун намуна топширган шахсда ҳамда тана ҳарорати кўтарилгани сабабли поликлиникага мурожаат қилган фуқарода қайд этилган.

Бундан ташқари, «Малика» савдо мажмуаси сотувчиси ишга чиқиш учун намуна топширганда, унда вирус борлиги маълум бўлган. Юнусобод туманида яшовчи ҳомиладор аёл шифохонага ётиш учун намуна топширган, унда ҳам вирус аниқланган. Сергели туманида яшовчи вақтинча ишсиз фуқаро ҳам вирус юқтириб олгани маълум бўлган. Бу фуқаро тана ҳарорати кўтарилгач, шифокорга мурожаат қилмасдан уй шароитида даволанган. Шунингдек, бу фуқаронинг 4 нафар оила аъзосида ҳам коронавирус тасдиқланган. Республика ихтисослаштирилган онкология ва тиббий радиология илмий-амалий тиббиёт марказида даволаниш учун намуна топширган фуқарода ҳам инфекция аниқланган.

Шунингдек, Самарқанд туманида яшовчи нафақадаги фуқаро онкология касаллиги сабабли шифохонага ётиш учун намуна топширганда, унда вирус аниқланган. Самарқанд шаҳридаги 24-мактаб фарроши кўкрак бези касаллиги бўйича намуна топширганда, коронавирус юқтириб олгани маълум бўлган. Коронавирус Бухоро вилояти Шофиркон туманида яшовчи ҳайдовчида ҳам ҳам тасдиқланган.

Эслатиб ўтамиз, Ўзбекистонда 16 июнь куни 230 кишида коронавирус аниқланди, уларнинг 104 нафари Қашқадарё вилоятида карантинга олинган фуқаролар ҳисобланади. Мазкур кўрсаткич мамлакатда пандемия бошланганидан буён қайд этилган энг юқори кунлик кўрсаткичлар қаторида иккинчи ўринни эгаллади. Энг юқори кўрсаткич 7 июнь куни қайд этилган бўлиб, ўша куни 237 кишида касаллик тасдиқланган.

Президент Шавкат Мирзиёев 16 июнь куни бўлиб ўтган видеоселекторда аҳоли орасида касаллик ҳолатлари кўпайиб бораётганини алоҳида таъкидлади ҳамда Тошкент шаҳри, Тошкент, Навоий ва Қашқадарё вилоятларида вазият мураккаб бўлиб турганини айтди.

Маълумот учун, аҳоли орасида коронавирусга чалиниш ҳолатлари сони 15 июнь куни 29 тани, 14 июнь куни 27 тани, 13 июнь куни 5 тани, 12 июнь куни 26 тани ташкил қилди.