Ijtimoiy tarmoqlarda Yunusobod tumanida IIO FMB xodimlari bir fuqaroni majburlab xizmat mashinasiga o‘tqazishga urinayotgani tasvirlangan video tarqaldi. Toshkent shahar IIBB axborot xizmatining ma’lum qilishicha, videodagi fuqaro IIO FMB chaqiruvini mensimaganligi sababli xodimlar uni ichki ishlar organlariga yetkazishga majbur bo‘lgan.
Videodan ko‘rish mumkinki, Chilonzor tumani IIO FMB xodimlari Yunusobod tumanida fuqaroni ichki ishlar organlariga yetkazish uchun xizmat avtomobiliga o‘tqazishga uringan. Fuqaro esa qarshilik ko‘rsatib, advokat taklif etilishini talab qilgan.
Ma’lumotlarga ko‘ra, 28-may kuni Chilonzor tumani IIO FMBga I.M. ismli fuqaro murojaat qilib, mol sotib olish bahonasida undan katta miqdorda pul olishgani, pulni ham qaytarib bermagan shaxslarga nisbatan chora ko‘rilishini so‘ragan.
Kelib tushgan ariza bo‘yicha tekshiruv o‘tkazish maqsadida Yunusobod tumanida yashovchi D.I. ismli shaxsga Chilonzor tumani IIO FMBga 11-iyun kuni yetib kelishi haqida chaqiriqnoma berilgan. Chaqiriqnoma berish vaqtida unga chaqiruv sababi ham tushuntirilgan.
“D.I. Chilonzor tumani IIO FMBning chaqiruvini mensimaganligi sababli Chilonzor tumani IIO FMB 1-son ichki ishlar bo‘limi xodimlari D.I.ning turar joyiga borib, uni ichki ishlar organlariga olib kelishga majbur bo‘lishgan”, — deyiladi xabarda.
Hozirgi vaqtda to‘plangan ma’lumotlar dastlabki tergov organlariga qonuniy chora ko‘rilishi uchun yo‘naltirilgan. Qayd etilishicha, D.I.ni qo‘lga olish choralari ko‘rilmoqda.
Izoh (0)