Тошкент—Самарқанд йўналишининг Оқолтин тумани ҳудудидан ўтган А-373 автомобиль йўли 13 июндан транспорт воситалари учун очилди. Ушбу йўл орқали сутканинг ёруғ вақтида ҳаракатланиш мумкин, деб хабар беради ИИВ ЙҲХББ ахборот хизмати.
Оқолтин тумани ҳудудидан ўтган М-34 автомобиль йўли билан Гулистон йўналиши бўйича ўтган йўлни боғлаб турувчи А-373 халқаро аҳамиятдаги автомобиль йўлига 1 май куни Сардоба сув омбори тўғонининг ёрилиши оқибатида зарар етганди. Шу билан бирга, ушбу сув тошқини сабаб Сардоба, Мирзаобод ва Оқолтин туманларидаги халқаро, давлат ва маҳаллий автомобиль йўллари, йўл кўприкларига ҳам жиддий зарар етиб, транспорт воситаларининг ҳаракатланиши чекланган эди.
Таъкидланишича, вилоят ҳудудидан бошқа вилоятларга транзит тартибида ўтиб кетаётган ҳайдовчилар эндиликда Тошкент—Самарқанд йўналиши бўйича транспорт воситаларида ҳаракатланиш вақтида М-34 автомобиль йўлининг 103-километридан А-373 автомобиль йўлидан фойдаланган ҳолда ўтиб кетишлари мумкин.
ЙҲХББнинг маълум қилишича, йўлнинг очилган қисмидаги кўприкларда таъмирлаш ишлари олиб борилаётганлиги ҳамда тирбандликларни олдини олиш мақсадида сутканинг қоронғу вақтида транспорт воситалари М-34 автомобиль йўлининг 103 километридан Тошкент—Душанбе йўналиши бўйича ҳаракатланишда давом эттиради.
Шу билан бирга, транзит тарзда Жиззах йўналишидан Тошкент ва водий вилоятларига йўл олган транспорт воситалари ҳайдовчилари А-373 автомобиль йўлининг 17-37 километрларида таъмирлаш ишлари кетаётганлиги сабабли Мирзаобод тумани ҳудудидан ўтган автомобиль йўли орқали Гулистон шаҳар йўналиши томон ҳаракатланиб, М-34 автомобиль йўлининг 119 километридаги чорраҳага чиқиб олишлари ва Тошкент ҳамда водий вилоятлари томон йўналишига чиқиб кетишлари мумкин.
Аввалроқ Сирдарёда сув тошқинидан зарар кўрган 26 километр йўлга асфальтобетон ётқизилгани тўғрисида хабар берилганди.
Мавзуга доир:
Изоҳ (0)