12 июнь куни соат 11:44 да Қонликўл тумани ҳудудидан ўтувчи Ғузор—Бухоро—Нукус—Бейнеу А380 автомобиль йўлида Damas русумли автомобиль ёниб кетди. Бу ҳақда ИИВ ЙҲХББ ахборот хизмати хабар берди.

Фото: ИИВ ЙҲХББ ахборот хизмати

Маълумотларга кўра, ичида икки нафар йўловчи бўлган Damas автомашинасини 29 ёшли А.Й. бошқариб кетаётган бўлган. Йўлнинг 847-километрида автомобилнинг двигатель қисмидаги симларнинг қисқа туташуви натижасида ёнғин юзага келган.

Таъкидланишича, ёнғин ўт ўчирувчилар томонидан бартараф этилган. Ёнғин натижасида тан жароҳати олганлар йўқ.

Мазкур ҳодиса юзасидан Қонликўл тумани ФВБ томонидан суриштирув ишлари олиб борилмоқда.

Фото: ИИВ ЙҲХББ ахборот хизмати

ИИВ ЙҲХББ барча ҳайдовчилардан бошқарувидаги транспорт воситаси техник созлигига эътиборли бўлишни ва носоз транспорт воситасини бошқармасликни сўрайди.

Аввалроқ Қамчиқ довонида ҳайдовчининг ухлаб қолиши оқибатида Damas тўхтаб турган юк машинасига бориб урилгани ҳақида хабар берилганди.