Tesla дунёдаги энг қиммат автомобиль компаниясига айланди

Tesla капитализацияси 190 миллиард долларлик маррани забт этиб, дунёдаги энг қиммат автомобиль компанияга айланди, деб хабар беради Bloomberg.

Таққослаш учун, иккинчи ўриндаги Toyota капитализацияси 182 миллиард долларни, Volkswagen’ники эса 75 миллиард долларни ташкил этади.

Рўйхатнинг тўртинчи поғонасидан 48 миллиард доллар билан Honda ўрин олган бўлса, кучли бешликка Daimler АG (41 миллиард доллар) якун ясаган.

Tesla компаниясининг акциялари 10 июнь куни савдоларда донаси учун 1000 доллардан қимматроққа баҳоланган ва 1025 долларлик рекорд кўрсаткични қайд этган. Йил бошида акцияларни 420 доллар эвазига харид қилиш мумкин эди. Шундай қилиб, Tesla акцияларига эгалик қилувчиларнинг капитали қарийб 2,5 баробарга кўпайди.

Таҳлилчилар Tesla акцияларининг қимматлашишини Хитойда электромобилларга бўлган талабнинг қайта юзага келгани билан боғламоқда. Шунингдек, бренднинг Шанхайда очилган заводи ҳам муҳим рол ўйнамоқда, у ерда 2020 йил охирига қадар 100 мингта машина йиғилиши керак.

Аввалроқ Apple ва Microsoft капитализациялари 1,5 триллион долларлик маррани забт этгани ҳақида хабар берилганди.