Сирдарёнинг тошқин остида қолган ҳудудларида 3,2 млрд сўмлик нафақа пуллари тарқатилди

Сирдарё вилоятининг 1 майдаги сув тошқинидан талафот кўрган ҳудудларида йўқолган 7002 та ҳужжат тикланди. Фавқулодда вазиятлар вазирлиги матбуот котиби Мурод Содиқовнинг маълум қилишича, мазкур тадбир ИИБ, Касбий таълимни ривожлантириш бошқармаси ҳамда Давлат хизматлари агентлиги томонидан амалга оширилган.

Қайд этишларича, нафақа олувчи фуқароларга ҳам ўз вақтида нафақа тўловларини етказиб бериш чоралари кўрилмоқда. Июнь ойи учун 4507 нафар фуқарога 3,2 миллиард сўмдан ортиқ нафақа тўловлари топширилган.

«4710 нафар фуқарога тошқин оқибатида зарар кўрган хонадон эгаларига товон тўловлари тушириш учун янги пласитик карталари очиб берилди. Бундан ташқари, 306 нафар йўқолган пластик карталар қайта тикланган», — деди ФВВ вакили.

Эслатиб ўтамиз, 1 май куни соат 05:55 да Сирдарё вилоятида жойлашган Сардоба сув омбори тўғонининг 6-пикет деворида сув чиқиши юзага келганди. Сув тошқини оқибатида 4435 та хонадон талафот кўрган. Улардан 2390 таси яроқсиз ҳолга келган, 2045 таси эса таъмирталаб ҳолатда. Бош прокуратура Сардоба фалокати юзасидан жиноят иши бўйича 4 та тергов версиясини кўриб чиқмоқда. Ҳозирда сув омбори иши бўйича икки киши қамоққа олинган. Сардоба тумани «Дўстлик» маҳалласида 37 та 1480 хонадонли; Мирзаобод тумани «Ҳақиқат» маҳалласида 20 та 800 хонадонли ва «Навбаҳор» маҳалласида 9 та 360 хонадонли кўп қаватли турар жой қурилиш ишлари бошланган.