Адлия вазири ўринбосари давлат фуқаролик хизматчиси нега сиёсий партияга аъзо бўла олмаслигини изоҳлади

Адлия вазири ўринбосари Баҳром Қўчқоров вазирликда ташкил этилган брифингда «Давлат фуқаролик хизмати тўғрисида»ги янги қонун лойиҳасининг 13-моддасида кўрсатилган сўнгги бандга изоҳ берди. Лойиҳадаги ушбу модданинг сўнгги банди хатбошисида давлат фуқаролик хизматчиси сиёсий партияга аъзо бўлиши мумкин эмаслиги қайд этилган.

Журналистлар сиёсий партияга аъзо бўлиш фуқароларнинг конституциявий ҳуқуқи эканлиги, бу конституцияда белгилангани, улар эркин фикр билдириши, партияга аъзо бўлиши сиёсий ҳуқуқи эканлигини қайд этган.

«Энди ўқитувчи давлат фуқаролик хизматчиси бўлса, сиёсий партияга аъзо бўла оладими йўқми? Сиёсий партия ҳаракатларида иштирок эта олмайдими? Қонун лойиҳасида аниқ реестр кўрсатилиши керак, қаерда бошланиб, қаерда тугайди, қайси касбларга тааллуқли. Чунки сайловлар бор, ҳар бир фуқаро ўзининг сиёсий қарашларини ифода этиши керак. Бунинг учун эса қайсидир партияга аъзо бўлиши, уюшиши керак, ушбу банд мавҳум бўлиб қолган», — деган саволга жавобан Қўчқоров қисқача изоҳ бериб ўтган.

Жумладан, вазир ўринбосари мисол тариқасида битта давлат органи ходимлари тўлиқ битта партияга аъзо бўлишини нотўғри эканлигини келтирди. Давлат хизмати назариясида, олинган хорижий илғор давлатлар амалиётида ҳам давлат хизматининг нейтралитет, деган принципи борлигини қайд этди. Давлат хизматчиси ёки фуқаролик хизматчиси маъмурий ёки профессионал хизматчи, сиёсий хизматчи эса партиялар, сиёсий масалалар билан боғлиқ мансабдор шахслиги, мисол учун, вазир ҳам сиёсий партияларнинг аъзоси бўлиши мумкинлигини билдирди.

Бошқа давлатларни оладиган бўлсак, ҳукуматни қандай шакллантирилади? Бу партиянинг бунча аъзоси кирди ҳукуматга, у партиянинг шунча аъзоси, кирди дейди. Лекин давлат фуқаролик хизматида нейтралитет бор, бу сиёсий мақсадлар билан аралашиб кетмаслиги керак. Бу давлат қонунини белгиланган тартибда амалга оширадиган хизмат. Шунинг учун бу ерда гап давлат фуқаролик хизматчиси ҳақида кетяпти. Сиёсий хизматчи партиялар билан боғлиқ, уни партиялар сайлайди.

Лекин бу ерда биз ҳаммасининг партияга аъзо бўлиши мумкинлигини берадиган бўлсак, юқорида келтирган битта мисолим саволга жавоб бўлмайди. Битта давлат органининг асосий қисми битта партия аъзолари, бу ерда манфаатлар тўқнашуви бўлади. Бу ерда айнан шу давлат хизматининг нейтралитетини йўқотиб қўямиз. Яъни сиёсий партияларнинг кучи ўзгаргани сари давлат хизматида ҳам ўзгариш бўлиб кетаверади. Бундай бўлмаслиги керак, бизда муқим, барқарор ривожланган давлат хизмати керак.

Баҳром Қўчқоров, Адлия вазири ўринбосари