«Андижон иқтисодиёт ва қурилиш институтини ташкил этиш тўғрисида» Вазирлар Маҳкамасининг қарор лойиҳаси эълон қилинди.
Унга кўра, Олий ва ўрта махсус таълим вазирлиги, Қурилиш вазирлиги ҳамда Андижон вилояти ҳокимлигининг Андижон вилояти Андижон шаҳрида Андижон иқтисодиёт ва қурилиш институтини ташкил этиш тўғрисидаги таклифига розилик берилади.
Институт фаолиятининг асосий йўналишларидан бири иқтисодиёт ва қурилиш соҳаси бўйича амалий кўникмаларга эга, рақобатбардош олий маълумотли мутахассислар ва илмий-педагогик кадрларни, шунингдек, оммавий касб мутахассисларини тайёрлаш, қайта тайёрлаш ва уларнинг малакасини ошириш ҳисобланади.
Белгиланишича, институт юридик шахс мақомига эга бўлган давлат олий таълим муассасаси ҳисобланади ва Олий ва ўрта махсус таълим вазирлиги тизимида фаолият юритади.
Таълим фаолияти 2020/2021-ўқув йилидан бошланади.
Институтга талабаларни қабул қилиш ҳар йили тасдиқланадиган республика олий таълим муассасаларига ўқишга қабул қилиш параметрларидан келиб чиққан ҳолда давлат буюртмаси ва тўлов-контракт асосида белгиланади.
Андижон вилояти, Андижон шаҳри, Навоий шоҳ кўчаси, 15-а уйда жойлашган Ўзбекистон Миллий университети ҳузуридаги техникум (собиқ Андижон маиший хизмат касб-ҳунар коллежи) бино ва иншоотларини (мавжуд жиҳоз ва мебеллари билан) тегишли ҳудуди билан биргаликда институтга оператив бошқарув ҳуқуқи асосида берилиши кутилмоқда.
Аввалроқ Андижон қишлоқ хўжалиги ва агротехнологиялар институтини ташкил этиш ҳақидаги қарор лойиҳаси муҳокамага қўйилгани, Ўзбекистонда Геология фанлари университети ташкил қилингани хабар берилган эди.
Изоҳ (0)