Бухоро вилоятининг собиқ ҳокими, 1996—2011 йилларда вилоятга раҳбарлик қилган Самойдин Ҳусенов вилоят Нуронийлар кенгаши раиси лавозимига тасдиқланди. Бу ҳақда «Дарё»га кенгаш матбуот котиби Зуҳра Қурбонова маълум қилди.
Таъкидланишича, 10 июнь куни Маҳалла ва оилани қўллаб-қувватлаш вазирлиги Бухоро вилоят бошқармаси бошлиғи Йўлдош Жумаев раислигида нуронийлар жамоатчилик кенгашининг биринчи ташкилий йиғилиши ўтказилган. Унда бошқарманинг 2020 йил 29 майдаги қарори билан 15 нафар аъзодан иборат вилоят нуронийлар жамоатчилик кенгаши таркиби шакллантирилиб, тасдиқланган.
«Нуронийлар жамоатчилик кенгаши тўғрисидаги низомга кўра, бошқарма бошлиғининг кексалар ва фахрийлар бўйича ўринбосари бир вақтнинг ўзида вилоят Нуронийлар кенгашига ҳам раислик қилиши белгиланган. Шунга кўра, кўп йиллик иш тажрибасига эга, кенг жамоатчилик ўртасида ўз ўрни ва ҳурматига эга бўлган Самойдин Ҳусенов Нуронийлар кенгаши раиси лавозимига тасдиқланди», — деди Йўлдош Жумаев.
Қайд этилишича, Бухоронинг собиқ ҳокими Самойдин Ҳусенов 2011 йил Биринчи Президент Ислом Каримов қарори билан лавозимидан озод қилинган. 2017 йилда эса Ўзбекистон фахрийларини ижтимоий қўллаб-қувватлаш «Нуроний» жамғармасининг Бухоро вилояти кенгаши раиси этиб сайланган.
Изоҳ (0)