Ўзбекистон Профессионал футбол лигаси коронавирус туфайли юзаган келган танаффус сабаб 2020 йилги ёзги трансферлар ойнаси муддатини ўзгартиргани ҳақида хабар берилганди.
Мамлакатда ёзги трансферлар ойнаси июль ойидан августга кўчирилган. Шу тариқа трансфер ойнаси 10—31 август оралиғида бўлиб ўтади. Олдин эса бу муддат 6—31 июль оралиғида амалда бўлган.
Шу масала юзасидан ПФЛ бош директори вазифасини бажарувчи Диёр Имомхўжаев қуйидагиларни баён қилди.
«ЎзПФЛ ёзги трансфер муддатини бундан 9 ой аввал 6—31 июль қилиб белгилаганди. Биз уни 10—31 август деб ўзгартиришга мажбур бўлдик.
Боиси, карантин даврида 2,5 ой футболсиз қолдик. Режамиз бўйича, 9 август куни Cоcа Cола Суперлиганинг биринчи давраси ўз якунига етади. Бу вақтгача Про лига, Биринчи лига ва аёллар Олий лигасида 6 тадан тур учрашувлари ўтказилади. Шундан келиб чиқиб, трансфер муддати ҳамма учун бир хил бўлади. Қолган лигалар ҳам трансфер ойнаси очилгунига қадар бир нечта тур ўтказиб улгуради.
2020 йилги трансфер бозорида ўзгаришлар катта бўлади ва мавсумнинг ўртасида кўчиб юрувчи футболчилар аввалги йилларга қараганда сезиларли камаяди. ПФЛ бу йўлда қадам ташлаб улгурган», — дейди Имомхўжаев.
Шунингдек, Диёр Имомхўжаев «Дарё» мухбири билан суҳбатда «кўчманчи футболчилар» трансфери қандай қилиб камайишига изоҳ берди.
«Аввал футболчилар янги клублари билан 1-2 йиллик шартнома тузиб, уни охиригача тугатмасидан бошқа клубларга ўтиб кетаверган. Олдин бунга ҳеч қайси ташкилот эътибор қаратмаган. Шу боисдан мавсумлар оралиғида бутун бошли жамоа таркиблари янгиланиб, ўзгариб кетган. Натижада «кўчманчи футболчилар» пайдо бўлди. Энди эса бу нарса сезиларли даражада камаяди. Боиси ПФЛ регламентида энди футболчилар ёки трансфер қилиниши лозим, ёки шартномасини охиригача тугатиши керак деган банд бор. Яъни эндиликда бирор бир футболчи ўзидан ўзи бошқа клубга шартномасини бузиб ўтиб кета олмайди. Уни ўз сафига қўшиб олмоқчи бўлган клуб, футболчи трансфери учун клубига пул тўлаши ёки шартномаси тугашини кутиши керак бўлади. Фақатгина узрли сабаблар бўлган тақдирдагина (шахсий, оилавий сабаблар) футболчини бошқа клуб рўйхатидан ўтказилиши кўриб чиқилиши мумкин», — дейди ПФЛ раҳбари.
Эслатиб ўтамиз, март ойида тўхтаб қолган Суперлига баҳсларига 13 июндан қайта старт берилади.
- Суперлига 4-турининг барча ўйинлари МТРКнинг 3 та канали орқали жонли эфирда намойиш этилади
- Суперлига 4-тур ўйинларини бошқариб борадиган ҳакамлар маълум бўлди
- Суперлига 5-тур ўйинлари бошланиш вақтлари маълум бўлди. Барча ўйинлар жонли эфирда намойиш этилади
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)