«Манчестер Юнайтед», «Эвертон» ва «Ди Си Юнайтед» нинг собиқ ҳужумчиси, ҳозирда «Дерби Каунти» клубида ўйновчи мураббий бўлиб ишлаётган Уэйн Руни жамоа сардорларининг машаққатлари ҳақида гапирди.
«Ўйинчилар нимадандир норози бўлса, улар кўпинча сардорга мурожаат қилади, натижада сиз мураббийга шикоят қилишингизга тўғри келади. Бу оғир суҳбатларга олиб келиши мумкин. Бир жамоада мендан мураббийга унинг машғулотлари етарли бўлмаётганини айтишимни илтимос қилишганди. Бу осон иш эмас. ‘Кечирасиз, мураббий. Йигитлар сизнинг машғулотларингизни расво деб ўйлаяпти’.
Сиз жуда кўп нарсаларни ўзингизга олишингиз керак. Сиз жамоанинг турли хил хайрия ва тижорий йиғилишларда ўйинчилар номидан чиқасиз, PFA (Англия профессионал футболчилари ассоциацияси) билан музокаралар ўтказасиз.
Терма жамоада сардор бўлиш бир тарафдан шараф, аммо шу билан бирга катта масъулият ҳамдир. Бу клубдаги сардорликдан фарқ қилади. Сиз у ердаги ўйинчилар билан клубдаги каби ҳар куни ўйнамайсиз. Терма жамоа сардори янги келган ўйинчиларни кутиб олиши ва уларнинг жамоага киришиб кетишига ёрдам бериши керак. Мен футболчилар бирга бўлиш учун кун давомида ўйин хонаси ва қаҳвахонада бўлишга ҳаракат қилардим. Айниқса, янги ўйинчилар билан яқин бўлишга ва улар билан суҳбатлашишга вақт ажратардим», — дейди Руни.
Маълумот учун, Руни «Эвертон» академияси тарбияланувчиси ҳисобланади. У фаолияти давомида қадрдон клубидан ташқари «Манчестер Юнайтед», MLS’нинг «Ди Си Юнайтед» клубларида тўп сурган. Ҳозирда эса Чемпионшипнинг «Дерби Каунти» жамоасида фаолият юритмоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)