«Футбол Экспресс» газетаси бош муҳаррири Шукурулло Исҳоқов нашр фаолияти тугатилгани ҳақида хабарларга шарҳ бериб ўтди.
Аввалроқ Ўзбекистонда 24 йилдан буён фаолият юритиб келаётган газета ёпилгани ҳақида хабар берилганди. «Дарё» мухбири бу масалага ойдинлик киритиш учун Шукурулло Исҳоқов билан боғланди.
— ОАВ воситаларида «Футбол Экспресс» газетасининг фаолияти тугатилгани ҳақида хабарлар пайдо бўлди. Кетидан бу ҳақиқатга тўғри келмайдиган маълумот эканлиги сиз томонингиздан маълум қилинди. Аслида нима бўлди?
— Хабарингиз бор, коронавирус пандемияси сабаб газета чиқарилиши тўхтаб қолди. Ходимлармиздан бири билан бўлган суҳбатда газетанинг фаолиятини қайта тиклашга ҳаракат борлиги, бироқ бу йўлда молиявий қийинчиликларга дуч келаётганимиз айтилганди. У эса ижтимоий тармоқларда «молиявий қийинчиликлар сабаб газета фаолияти тугатилса керак», дея шахсий фикрини билдирган. Шундан кейин мазкур маълумотлар асосида хабарлар эълон қилинди. (Аслида «Дарё»га ҳам номи ошкор этилишини истамаган газетага алоқадор шахс нашр фаолияти тўхтатилганини маълум қилганди)
— Демак, газета фаолияти расман тугатилмаган, шундайми?
— Йўқ. Ҳозирда газета фаолиятини қайта тиклаш устида ишлаяпмиз. Матбуот тарқатувчиларда пулларимиз қолиб кетган. Пул тушиши билан, шу кунларда чоп этишни бошлаймиз. Тўғри вазият қийин, аммо фаолиятимизни давом эттиришга ҳаракат қиламиз.
— Газета чоп этилиши қачон ва нима сабабдан тўхтаб қолганди?
— Сўнгги сон 14 март куни чиқди. Кейинчалик пандемия сабаб шаҳарларда ҳаракатлар чекланди ва матбуот тарқатувчилар фаолияти тўхтаб қолди. Шу сабаб фақат биз эмас, аксарият газеталар фаолиятини тўхтатиб туришга мажбур бўлди.
— Суперлига ҳам қайта бошланмоқда, сизлар рестартни қачонга мўлжаллаяпсиз?
— 1 июлга қолмай чиқариб юборсак керак. Айни дамларда Фарғона ва Тошкентдаги матбуот тарқатувчилар билан боғланяпмиз. Улардан пулни олишимиз билан чоп этишни бошлаб юборамиз. Бошламасак бўлмайди, ходимлар ишсиз қолиб кетади, уларни вақтинчалик таътилга чиқариб туришга мажбур бўлдик. Бунинг устига бу севимли касбимиз.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)